వీడియో: 'ప్రేమంటే ఏంటి' గీతంతో పాటల సందడి షురూ చేసిన 'పెళ్లి సందD'

దర్శకేంద్రుడు కె.రాఘవేంద్రరావు తెరకెక్కించిన బిగ్గెస్ట్ మ్యూజికల్ హిట్ 'పెళ్లిసందడి' తరహాలో ''పెళ్లి సందD'' అనే చిత్రాన్ని ప్రకటించిన సంగతి తెలిసిందే. రాఘవేంద్రరావు ఈ చిత్రానికి స్క్రీన్ ప్లే అందిస్తూ దర్శకత్వ పర్యవేక్షణ చేస్తున్నారు. దీనికి గౌరీ రోనంకి దర్శకత్వం వహిస్తున్నారు. ఈ సినిమాలో సీనియర్ హీరో శ్రీకాంత్ తనయుడు రోషన్ హీరోగా నటిస్తుండగా.. తెలుగమ్మాయి శ్రీలీల హీరోయిన్ గా పరిచయం అవుతోంది. ఇప్పటికే షూటింగ్ ఫైనల్ స్టేజీలో ఉన్న ఈ చిత్రానికి సంబంధించిన ఫస్ట్ సాంగ్ ని తాజాగా విడుదల చేసారు. రాఘవేంద్రరావు కి ఏప్రిల్ 28వ తేదీతో ఉన్న సెంటిమెంట్ తో ఈరోజు 'ప్రేమంటే ఏంటి' అని సాంగ్ లిరికల్ వీడియోని రిలీజ్ చేశారు.

'నువ్వంటే నాకు ధైర్యం.. నేనంటే నీకు సర్వం.. నీకూ నాకు ప్రేమ.. ప్రేమంటే ఏంటి' అంటూ సాగిన ఈ సోల్ ఫుల్ సాంగ్ శ్రోతలను విశేషంగా ఆకట్టుకుంటోంది. కీరవాణి అందించిన బాణీలకు లిరిసిస్ట్ చంద్రబోస్ అందమైన పదాలను సాహిత్యంగా అందించారు. ఈ పాటను హరిచరణ్ - శ్వేతా పండిట్ కలిసి ఆలపించారు. ఈ సాంగ్ లో హీరోహీరోయిన్లు ముద్దుపెట్టుకోడానికి ట్రై చేస్తుండగా.. వారి మధ్యలో ఉన్న బెలూన్ పగిలిపోవడం వంటివి దర్శకేంద్రుడి గత చిత్రాల పిక్చరైజేషన్ ను గుర్తు చేస్తున్నాయి. 'ప్రేమంటే ఏంటి' పాటను అందమైన మంచు లొకేషన్స్ లో షూట్ చేసినట్లు తెలుస్తోంది. దీనికి శేఖర్ మాస్టర్ కొరియోగ్రఫీ చేశారు. సునీల్ కుమార్‌ సినిమాటోగ్ర‌ఫీ అందించగా.. త‌మ్మిరాజు ఎడిటింగ్ వర్క్ చేశారు.

రాఘవేంద్రరావు - కీరవాణి - చంద్రబోస్ కలిసి మ్యాజిక్ రిపీట్ చేసారని 'ప్రేమంటే ఏంటి' పాట వింటే అర్థం అవుతోంది. అప్పుడు 'పెళ్లి సందడి' మాదిరిగానే ఇప్పుడు 'పెళ్లి సందD' సినిమాతో మ్మరోసారి పాటల సందడి మొదలైందని చెప్పవచ్చు. ఈ రొమాంటిక్ మ్యూజిక‌ల్ ఎంట‌ర్‌టైన‌ర్ ని కె. కృష్ణ‌మోహ‌న్ రావు‌ సమర్పణలో ఆర్‌.కె. ఫిలిం అసోసియేట్స్‌ - ఆర్కా మీడియా వర్క్స్‌ బ్యానర్స్ పై నిర్మిస్తున్నారు. మాధవి కోవెలమూడి - శోభు యార్లగడ్డ - ప్రసాద్‌ దేవినేని నిర్మాతలుగా వ్యవహరిస్తున్నారు.