స్టార్ హీరో డైరెక్షన్లో సూపర్ స్టార్

ఒక స్టార్ హీరో డైరెక్షన్ చేయడం.. ఆ సినిమాలో ఒక సూపర్ స్టార్ హీరోగా నటించడం అరుదైన విషయం. మలయాళ పరిశ్రమలో ఈ చిత్రం చూడబోతున్నాం. పోలీస్ పోలీస్.. విలన్.. ఉరిమి లాంటి సినిమాలతో తెలుగు ప్రేక్షకులకు కూడా బాగానే పరిచయం ఉన్న మలయాళ స్టార్ హీరో పృథ్వీరాజ్ మెగా ఫోన్ పట్టేస్తున్నాడు. అతను సూపర్ స్టార్ మోహన్ లాల్ హీరోగా ఓ సినిమా తెరకెక్కిస్తుండటం విశేషం. ఆ సినిమా పేరు.. లూసిఫర్. నటుడిగానే కాక నిర్మాతగా.. గాయకుడిగానూ తన అభిరుచిని చాటుకున్న పృథ్వీరాజ్.. దర్శకుడిగా మారాలని చాలా కాలంగా కలలు కంటున్నాడు.

మెగా ఫోన్ పడితే తొలి సినిమా మోహన్ లాల్ తోనే చేస్తానని ఇంతకుముందే ప్రకటించిన పృథ్వీరాజ్ అనుకున్నది సాధించాడు. ఓ స్క్రిప్టుతో తన అభిమాన కథానాయకుడిని మెప్పించాడు. నటుడు.. రైటర్ మురళీ గోపి ఈ చిత్రానికి స్క్రిప్టు అందిస్తున్నాడు. మరో హీరో కుంచుకో బోబన్ కూడా ఇందులో కీలక పాత్ర చేస్తున్నాడు. మలయాళ పరిశ్రమలో ఈ కాంబో సంచలనం రేపుతోంది. ఇది ఓ గ్యాంగ్ స్టర్ మూవీ అని సమాచారం. మోహన్ లాల్ ఫస్ట్ లుక్ కూడా అదుర్స్ అన్న ఫీడ్ బ్యాక్ వస్తోంది. మరి నటుడిగా మంచి పేరు సంపాదించిన పృథ్వీరాజ్ దర్శకుడిగా ఎలాంటి ప్రతిభ చూపిస్తాడో.. మోహన్ లాల్ ను ఎలా ప్రెజెంట్ చేస్తాడో చూడాలి.

Like Us on Facebook : https://www.facebook.com/Tupakidotcom/