గుట్టువిప్పని కన్నుగీటు సుందరి

ఒకే ఒక్క చిన్న వీడియోతో ఓవర్ నైట్ సెన్సేషన్ గా మారిన ప్రియా ప్రకాష్ వారియర్ కు క్రమంగా మబ్బులు వీడుతున్నాయి. ఏడాది క్రితం ఓరు ఆధార్ లవ్ (తెలుగు లవర్స్ డే) టీజర్ ద్వారా వింక్ బ్యూటీగా సంచలనం సృష్టించిన ఈ భామ తీరా సినిమా ఫలితం దారుణంగా నిరాశ పరచడంతో షాక్ తింది. ఆ వీడియో వైరల్ అయినంత కాలం అవకాశాలు ఇస్తామంటూ వెంటపడిన అగ్ర దర్శకనిర్మాతలందరూ మొహం చాటేశారు. తన రెండో సినిమా శ్రీదేవి బంగ్లాని కాంట్రావర్సీ మీద పబ్లిసిటీ చేద్దామనుకున్నా అడిగే నాధుడు లేడు.

ఇదిలా ఉండగా ఇటీవలే ఓరు ఆధార్ లవ్ మెయిన్ హీరోయిన్ నూరిన్ షరీఫ్ దర్శకుడు ఒమర్ లుల్లూ ప్రియాను టార్గెట్ చేసి తీవ్రమైన కామెంట్స్ చేసిన సంగతి తెలిసిందే. నూరిన్ ఇకపై ప్రియాతో నటించేది లేదని తెగేసి చెప్పగా ఒమర్ లుల్లూ కూడా ప్రియా వారియర్ పాత్ర వల్లే సినిమా పోయింది అన్నట్టుగా మాట్లాడాడు. దీనికి వింక్ సుందరి స్పందించింది. తాను కనక నోరు విప్పితే కొన్ని జీవితాలు తలకిందులు అవుతాయని కానీ ఇప్పుడా అవసరం లేదని విధి అన్ని చూసుకుంటుందని వేదాంత ధోరణిలో సమాధానమిచ్చింది.

నూరిన్ ఒమర్ లుల్లూల కామెంట్స్ కు నేరుగా సమాధానం చెప్పకుండా దాటవేసింది. అప్పట్లో ఆ టీజర్ సెన్సేషన్ అయ్యాక ఒమర్ లుల్లూ ఇంకే సినిమాల్లో నటించకుండా ప్రియా వారియర్ తో అగ్రిమెంట్ రాయించుకున్నాడని దాని వల్లే ఎన్ని ఆఫర్స్ వచ్చినా ప్రియా తిరస్కరించిందని వార్తలు వచ్చాయి. తీరా ఇప్పుడు అవన్నీ దూరమైపోయి ప్రియా వారియర్ నేలమీదకు వచ్చేసిందని మల్లు వుడ్ లో కథనాలు జోరుగా వస్తున్నాయి. ఏదేమైనా సరైన సమయంలో సరైన రీతిలో ప్లానింగ్ చేసుకోకపోతే ఫలితం ఎలా ఉంటుందో చెప్పడానికి ప్రియా వారియర్ ను మించిన ఉదాహరణ అక్కర్లేదేమో