నాని భామకు మరో రొమాంటిక్ మూవీ

ప్రియశ్రీ అంటే టక్కుమని గుర్తొచ్చేయడం జనాలకు కాసింత కష్టమే కానీ.. గ్లామర్ ప్రియులకు మాత్రం పరిచయం అవసరం లేదు. నాని హీరోగా గతేడాది రిలీజ్ అయిన మజ్ను మూవీలో నటించింది ప్రియశ్రీ. తన అందంతో పాటు అభినయంతోనూ ఆడియన్స్ ను ఆకట్టుకున్న ప్రియశ్రీ.. అక్కడి నుంచి దాదాపు ఏడాది గడిచిపోయినా కొత్త సినిమాకు అంగీకరించలేదు. అరంగేట్రంలోనే సక్సెస్ అందుకున్న వయ్యారికి అవకాశాలకు కొదువ ఏమీ ఉండదు. కానీ ఈ బ్యూటీ స్క్రిప్ట్ సెలక్షన్ లో బాగా ఆచి తూచి వ్యవహరిస్తుందనే టాక్ ఉంది.

మోడల్ గా కూడా వెలుగులు విరజిమ్మతున్న ముంబై భామ ప్రియశ్రీ.. ఇప్పుడు మరో తెలుగు సినిమాకు సైన్ చేసింది. శోభన్ హీరోగా రూపొందుతున్న ఓ సినిమాలో నటించనుందట ప్రియశ్రీ. పేపర్ బోయ్ అనే టైటిల్ పై రూపొందుతున్న ఈ మూవీ రొమాంటిక్ డ్రామాగా తెరకెక్కనుండగా.. ఇందులో కాలేజ్ అమ్మాయిగా కనిపిస్తుందట ప్రియశ్రీ. ధనవంతుల కుటుంబం నుంచి వచ్చిన ఓ కాలేజ్ గాళ్ రోల్ లో ప్రియశ్రీ కనిపిస్తుందని.. అయితే.. ఆమె పాత్రలో పలు ఆసక్తికరమైన కోణాలు ఉంటాయని చెబుతున్నాడు దర్శకుడు జయ్ శంకర్.

అసలు ఈ సినిమాకు ప్రియశ్రీ సైన్ చేయడం వెనక కారణం కూడా ఆమెకు ఈ పాత్ర తెగ నచ్చేయడమేనట. తన వయసుకు తగిన రోల్ కావడంతో.. స్క్రిప్ట్ కు ఈజీగా కనెక్ట్ అయిపోయిందని.. ఆ పాత్రలో ఉన్న పలు కోణాలు నచ్చేయడంతో వెంటనే ఈ ప్రాజెక్టుకు సైన్ చేసిందని చెబుతున్నారు. ఇప్పటికే ఈ పేపర్ బోయ్ షూటింగ్ ప్రారంభం కాగా.. ఈ ఏడాది చివరకు షూటింగ్ పూర్తి చేసేలా దర్శక నిర్మాతలు ప్లాన్ చేసుకున్నారు.