'పీసీ' నే రెండోసారీ పీపుల్స్ ఛాయిస్!

హాలీవుడ్ అరంగేట్రంతో ఇప్పటికే గ్లోబల్‌ స్టార్‌‌ గా మారిపోయిన ప్రియాంక చోప్రా.. తాజాగా మరోసారి పీపుల్స్‌ చాయిస్‌ అవార్డు అందుకుంది. ఏబీసీ నిర్మించిన "క్వాంటికో" టీవీ సిరీస్‌ లో అలెక్స్‌ ప్యారీస్‌ పాత్రలో నటించిన ప్రియాంక... ఫేవరెట్‌ డ్రమటిక్‌ టీవీ యాక్ట్రెస్‌ విభాగంలో ఈ అవార్డును అందుకుంది. ఈ అవార్డును అందుకోవడం కోసం... అమెరికా ప్రఖ్యాత టీవీ నటీమణులు వియలో డేవీస్, కెర్రీ వాషింగ్టన్, హెలెన్, తారజీ వంటి వాళ్లని వెనక్కి నెట్టేయడం విశేషం.

ఈ నేపథ్యంలో తన మనసులోని మాటలను బయటపెట్టిన ప్రియాంక... ఇది ఒక అద్భుతమైన ప్రయాణమని, ఈ సందర్భంగా తనను మంచి నటిగా భావించి ఆదరించినవారందరికీ ధన్యవాదాలు తెలిపింది. ఇటీవల జరిగిన గోల్డెన్‌ గ్లోబ్‌ అవార్డుల వేడుకల్లో బంగారు రంగు దుస్తుల్లో మెరిసిన ప్రియాంక.. ఈ అవార్డుల కార్యక్రమానికి బేబీ పింక్‌ డ్రెస్‌ లో హాజరై.. కెమేరా కళ్లన్నింటినీ ఒకేసారి తనవైపు తిప్పుకుంది.

ఈ సందర్భంగా అమెరికా భావి అధ్యక్షుడు డొనాల్డ్‌ ట్రంప్‌ గురించి మీడియా అడిగిన ప్రశ్నకు తనదైన రీతిలో జవాబు చెప్పిన ప్రియాంక... జర్నలిస్టులకు షాకిచ్చింది. పీపుల్స్ చాయిస్ అవార్డు అందుకున్న అనంతరం మీడియాతో ముచ్చటించిన ప్రియాంకకు... "కొత్తగా ఎన్నికైన అమెరికా అధ్యక్షుడైన డొనాల్డ్ ట్రంప్‌ గురించి మీరేమైనా భయపడుతున్నారా?" అని ప్రశ్న ఎదురైంది. ఈ సందర్భంగా స్పందించిన ప్రియాంక... "నేను భారతీయురాలిని.. మీకు భయంగా ఉందా?" అని ధీటుగా సమాధానం ఇచ్చింది. కాగా... హాలీవుడ్ డెబ్యూ మూవీ "బేవాచ్‌" తో ఈ వేసవిలో లో థియేటర్లలో సందడి చేసేందుకు సిద్ధమవుతోంది ప్రియాంక.