అశ్వనీదత్ ఆ సీక్వెల్ ను మాత్రం మరిచిపోవడం లేదే!

టాలీవుడ్ లో భారీ చిత్రాల నిర్మాతగా అశ్వనీదత్ కి మంచి పేరు ఉంది. ఆయన వైజయంతీ మూవీస్ బ్యానర్ నుంచి ఎన్నో విజయవంతమైన చిత్రాలు వచ్చాయి. ఎన్టీఆర్ తరం నుంచి నేటి వరకూ ఈ బ్యానర్ విభిన్నమైన సినిమాలను అందిస్తూ వస్తోంది. మధ్యలో వరుసగా పరాజయాలను .. ఆర్థికపరమైన నష్టాలను ఎదుర్కుంటూ వచ్చింది. 'మహానటి' .. 'జాతిరత్నాలు' .. 'సీతా రామం' సినిమాలు ఈ బ్యానర్ కి మళ్లీ పూర్వ వైభవాన్ని తెచ్చాయి. అలాంటి అశ్వనీదత్ బ్యానర్లో ఇప్పుడు 'ప్రాజెక్టు K' రూపొందుతోంది.

అశ్వనీదత్ అల్లుడు నాగ్ అశ్విన్ మంచి రచయిత .. దర్శకుడు. ఆయన దర్శకత్వంలోనే ప్రభాస్ హీరోగా 'ప్రాజెక్టు K' నిర్మితమవుతోంది. కథాపరంగా .. ఖర్చు పరంగా ఇది పాన్ వరల్డ్ సినిమా అంటూ నాగ్ అశ్విన్ ఈ సినిమాపై అందరిలో అంచనాలు పెంచేశాడు. దాంతో ఇంతటి భారీతనమున్న ఈ సినిమానే అశ్వనీదత్ డ్రీమ్ ప్రాజెక్టు కావొచ్చునేమోనని అనుకోవడం సహజం. కానీ ఇది తన డ్రీమ్ ప్రాజెక్టు కాదని ఆయన తేల్చిపారేశాడు. తన బ్యానర్ ప్రతిష్ఠను పెంచిన 'జగదేకవీరుడు అతిలోక సుందరి'కి సీక్వెల్ చేయాలని ఉందనీ .. అదే తన డ్రీమ్ ప్రాజెక్టు అని చెప్పుకొచ్చారు.

చిరంజీవి - శ్రీదేవి జంటగా రూపొందిన 'జగదేకవీరుడు అతిలోక సుందరి' సినిమా 1990లో ప్రేక్షకుల ముందుకు వచ్చింది.
రాఘవేంద్రరావు దర్శకత్వం వహించిన ఈ సోషియో ఫాంటసీ మూవీ ప్రేక్షకులను మరో లోకంలోకి తీసుకుని వెళ్లింది. కథాకథనాల పరంగా .. పాటల పరంగా ఈ సినిమా సంచలన విజయాన్ని సాధించింది. ఇళయరాజా ఈ సినిమాను మ్యూజికల్ హిట్ గా నిలబెట్టారు. అలాంటి ఆ సినిమాకి సీక్వెల్ చేయాలనీ .. అదే తన చివరి కోరిక అని 'ఆలీతో సరదాగా' షోలో అశ్వనీదత్ చెప్పారు.

గతంలో కూడా ఈ సీక్వెల్ చేస్తే బాగుంటుందనే అభిప్రాయాన్ని చాలామంది వ్యక్తం చేశారు. చిరంజీవి వారసుడైన చరణ్ .. శ్రీదేవి వారసురాలు జాన్వీ చేస్తే వచ్చే కిక్కు ఒక రేంజ్ లో ఉంటుందని చెప్పుకున్నారు. ఇక ఇప్పుడున్న పరిస్థితుల్లో ఆ సీక్వెల్ కి విజయేంద్ర ప్రసాద్ మాత్రమే కథను తయారు చేయగలడు .. ఈ తరహా కథకి రాజమౌళి మాత్రమే న్యాయం చేయగలడు అనే బలమైన అభిప్రాయాలు ఉన్నాయి. మరి అశ్వనీదత్ ఈ ప్రాజెక్టును రాజమౌళికి అప్పగిస్తాడా? లేదంటే నాగ్ అశ్విన్ చేతుల్లోనే పెడతాడా? అనేది చూడాలి.