షారుఖ్ ఖాన్ ను 8 కోట్లకు ముంచేశాడట..

షారుఖ్ ఖాన్ ఎంత పెద్ద స్థాయి వ్యక్తి. అతణ్ని ఎవరో ఊరూ పేరు లేని నిర్మాత రూ.8 కోట్లకు ముంచేశాడట. అది జరిగి కూడా చాలా ఏళ్లేమీ అయిపోలేదు. గత కొన్నేళ్లలోనే జరిగిందట. కొంత కాలం కిందట తనతో ఓ సినిమా తీస్తానంటూ ఓ కథతో వచ్చాడట ఓ వ్యక్తి. అతను అప్పటికి నిర్మాత ఏమీ కాదు. బిజినెస్ మేన్. ఐతే కథ నచ్చడంతో ఆ సినిమా చేయడానికి ఒప్పుకోవడమే కాదు.. నిర్మాణ భాగస్వామిగా కూడా ఉండటానికి అంగీకరించాడట షారుఖ్. భారీ గ్రాఫిక్స్ తో ముడిపడ్డ సినిమా కావడంతో.. ముందు రూ.8 కోట్లిచ్చి ఆ పనులు మొదలుపెట్టమని చెప్పాడట షారుఖ్.

సరే అని చెప్పి రూ.8 కోట్లు తీసుకెళ్లిన ఆ వ్యక్తి తర్వాత టచ్ లో లేడట. ఐతే గ్రాఫిక్స్ పనులు ఏమయ్యాయో చూద్దామని అతడి కార్యాలయానికి వెళ్తే అక్కడ ఎవ్వరూ లేకుండా ఖాళీగా కనిపించిందట. ఆ వ్యక్తి అడ్రస్ తెలుసుకుని వెళ్లి కలిస్తే తనకు వ్యాపారంలో భారీ నష్టాలు వచ్చాయని.. ఇప్పుడు సినిమా తీసే పరిస్థితుల్లో లేనని చేతులెత్తేశాడట. మరి తన డబ్బుల సంగతేంటని అడిగితే.. కొంత టైం అడిగాడట. షారుఖ్ సరే అని వచ్చేశాడట. కానీ కొంత కాలానికి అతను పత్తా లేకుండా పోయాడని.. దీంతో తన రూ.8 కోట్లు బూడిద పాలయ్యాయని అంటున్నాడు షారుఖ్. ఐతే షారుఖ్ స్థాయి వ్యక్తిని రూ.8 కోట్లకు మోసం చేసి.. పత్తా లేకుండా పోవడమంటేనే నమ్మశక్యంగా అనిపించట్లేదు జనాలకు.