'మాజీ ప్రియుడితో నయన్ రొమాన్స్' వార్తలపై క్లారిటీ ఇచ్చిన ప్రొడ్యూసర్..!

లేడీ సూపర్ స్టార్ నయనతార తన మాజీ ప్రియుడితో ఒక రొమాంటిక్ థ్రిల్లర్ సినిమాలో నటించే ఛాన్స్ ఉన్నట్లు గత కొన్ని రోజులుగా కోలీవుడ్ మీడియా కూడై కూస్తోంది. నటుడు డ్యాన్స్ మాస్టర్ ప్రభుదేవా దర్శకత్వంలో ఇశారి కె. గణేశ్‌ నిర్మాతగా 'కరుప్పు రాజా వెలై రాజా' అనే చిత్రం కొన్నేళ్ల కిందట ప్రారంభమైంది. విశాల్‌వ్ - కార్తీ ప్రధాన పాత్రల్లో కొంత షూటింగ్‌ జరుపుకున్న ఈ చిత్రం అనివార్య కారణాల వల్ల రెండేళ్ల క్రితం ఆగిపోయింది. అయితే తాజాగా ఇది తిరిగి సెట్స్‌ పైకి వెళ్లనుందంటూ వార్తలు చక్కర్లు కొడుతున్నాయి. అంతేకాకుండా త్వరలో స్టార్ట్ అవ్వబోతున్న ఈ చిత్రంలో మాజీ ప్రియులు ప్రభుదేవా - నయనతార కలిసి నటించనున్నారంటూ ప్రచారం జరుగుతోంది. ఈ నేపథ్యంలో నిర్మాత ఇశారి గణేశ్‌ ఈ వార్తలపై స్పందించారు. ప్రభుదేవా - నయనతార తన సినిమాలో నటించడం లేదని అవన్నీ అవాస్తవాలేనని తేల్చి చెప్పారు.

ఆయన మాట్లాడుతూ 'కరుప్పు రాజా వెలై రాజా’ చిత్రంలో ప్రభుదేవా - నయన్‌ కలిసి నటిస్తున్నారని వస్తోన్న వార్తల్లో నిజం లేదని.. ప్రభుదేవా దర్శకత్వంలో కార్తీ - విశాల్‌ ప్రధాన పాత్రల్లో నేను నిర్మించాలనుకున్న సినిమా కొన్ని సంవత్సరాల క్రితమే వాయిదా పడింది. ఇప్పుడు ఆ సినిమాను పూర్తి చేయాలనే ఉద్దేశం నాకు లేదు’ అని గణేశ్‌ స్పష్టం చేసారు. అంతేకాకుండా నయనతారతో ప్రస్తుతం ఒక సినిమా చేస్తున్నట్లు.. కుదిరితే మరొక ప్రాజెక్ట్ కూడా చేసే ఛాన్స్ ఉందని వెల్లడించారు. ప్రొడ్యూసర్ క్లారిటీ ఇవ్వడంతో ఈ రూమర్స్ కి ఫుల్ స్టాప్ పడినట్లయింది. మరి భవిష్యత్తులో అయినా నయన్ తన మాజీ ప్రియుడితో అవకాశం వస్తే నటిస్తుందో లేదో చూడాలి. ప్రస్తుతం నయనతార ఆర్జే బాలాజీ ద‌ర్శ‌క‌త్వంలో ''మూకుతి అమ్మాన్‌" చిత్రంలో నటిస్తోంది. ఈ చిత్రాన్ని ఇశారి గణేశ్‌ నిర్మిస్తున్నారు. ఇదిలా వుండ‌గా న‌య‌న‌తార‌, స‌మంత హీరోయిన్లుగా.. విజ‌య్ సేతుప‌తి హీరోగా త‌మిళంలో 'కాదువాక్కుల రెండు కాదల్‌' సినిమా తెర‌కెక్కనుంది. దీనికి న‌య‌న్ ప్రజంట్ లవర్ విఘ్నేష్ శివ‌న్ ద‌ర్శ‌క‌త్వం వ‌హించ‌నున్నాడు.