'ఎఫ్ 3' ఫుల్ మీల్స్ లా ఉంటుంది: దిల్ రాజు

టాలీవుడ్ స్టార్ ప్రొడ్యూసర్స్ లో దిల్ రాజు ఒకరు. చాలామంది నిర్మాతలు ఒక సినిమా తరువాత మరో సినిమాను పట్టాలెక్కిస్తూ ఉంటారు. కానీ ఒకేసారి మూడు నాలుగు సినిమాలను సెట్స్ పైకి తెసుసుకుని వెళ్లి, అనుకున్న సమయానికి వాటిని థియేటర్లకు తీసుకుని వచ్చే సమర్థవంతమైన నిర్మాతగా ఆయనకి పేరు ఉంది. అలాగే ఏ హీరోకి ఏ కథ వర్కౌట్ అవుతుంది .. ఎలాంటి కథ ఏ తరగతి ఆడియన్స్ కి కనెక్ట్ అవుతుందనేది ఆయనకి బాగా తెలుసు. అనిల్ రావిపూడిలోని టాలెంట్ ను గుర్తించి ఆయనకి వరుస అవకాశాలిస్తూ వస్తున్నది దిల్ రాజునే.

ఈ ఇద్దరి మధ్య మంచి అవగాహన .. సాన్నిహిత్యం ఉన్నాయి. ఈ ఇద్దరి కాంబినేషన్లో 'ఎఫ్ 2' సినిమాకి సీక్వెల్ గా 'ఎఫ్ 3' సినిమా నిర్మితమైంది. గ్లామరసం .. హ్యూమరసం ఉన్న సినిమా ఇది. దేవిశ్రీప్రసాద్ సంగీతం ఈ సినిమాకి హైలైట్ అవుతుందని అంటున్నారు. అలాంటి ఈ సినిమాను ఈ నెల 27వ తేదీన థియేటర్లకు తీసుకుని వస్తున్నారు. ఈ నేపథ్యంలో ఈ సినిమా ప్రమోషన్స్ ఊపందుకున్నాయి. అందులో భాగంగా నిన్నరాత్రి ప్రీ రిలీజ్ ఈవెంట్ జరిగింది. ఈ స్టేజ్ పై దిల్ రాజు మాట్లాడారు.

"అందరికీ నమస్కారం .. ఎప్పుడో వెంకటేశ్ చెప్పిన ఒక డైలాగ్ గుర్తొస్తోంది. 'వి ఫర్ విజయ్ అనేది పాత సామెత .. వి ఫర్ విక్టరీ అనేది నేను సృష్టించిన సామెత అనేది ఆ డైలాగ్. మా అనిల్ రావిపూడి కూడా అలా 'ఎఫ్ 2' తరువాత 'ఎఫ్ 3'ని క్రియేట్ చేశాడు. ఎంతమంది అవసరమైతే అంతమంది ఆర్టిస్టులను పెట్టి మిమ్మల్ని నవ్వించడానికే ప్రిపేర్ చేశాడు. లాజిక్కులతో పని లేకుండా థియేటర్లో మిమ్మల్ని రెండున్నర గంటలసేపు నవ్వించి పంపిస్తాడు. దానికి మాకు ఇద్దరు అద్భుతమైన హీరోలు దొరికారు.

మా రామానాయుడుగారి అబ్బాయి వెంకటేశ్ గారు .. మా నాగబాబు గారి అబ్బాయి వరుణ్ తేజ్ గారు మాకు దొరికారు. 'ఎఫ్ 2'లో ఎలా అయితే వాళ్లు సందడి చేశారో .. ఈ సినిమాలోనూ వాళ్లు అంతే అల్లరి చేశారు. అలాగే ఈ సినిమాలో బ్యూటిఫుల్ హీరోయిన్స్ ఉన్నారు. 'ఎఫ్ 2'లో ఇద్దరు హీరోయిన్స్ ఉంటే ఈ సినిమాలో నలుగురిని చేశారు. ఇక సునీల్ .. అలీ వంటి కమెడియన్స్ ఉన్నారు. మొన్న సెన్సార్ వాళ్లు ఈ సినిమా ఫుల్ మీల్స్ లా ఉందని చెప్పారు. 'ఎఫ్ 2'కి మీరు ఎంత బాగా ఎంజాయ్ చేశారో .. 'ఎఫ్ 3'ని అంతకంటే ఎక్కువగా ఎంజాయ్ చేస్తారు .. బీ రెడీ" అంటూ ముగించారు.