సీక్వెల్స్ వెన‌క గుట్టు విప్పాడు!

గ‌త కొంత‌కాలంగా అన్ని ఇండ‌స్ట్రీస్‌లోనూ సీక్వెల్ సినిమాల హ‌వా సాగుతోంది. వ‌రుస‌గా ఇలా సీక్వెల్స్ తెర‌కెక్కించ‌డానికి అస‌లు కార‌ణ‌మేంటి? ఆ గుట్టు లీక్ చేస్తారా.. ప్లీజ్! అని `పందెంకోడి 2` నిర్మాతల్లో ఒక‌రైన‌ ఠాగూర్ మ‌ధుని అడిగేస్తే ఆయ‌నేమ‌న్నారో తెలుసా?

హిట్టొచ్చిన సినిమాకి సీక్వెల్ తీస్తుంటే జ‌నాల్లో ఉండే క్రేజు వేరు. మ‌రో హిట్టొచ్చేందుకు ఆస్కారం ఉంది. అందుకే సీక్వెల్ సినిమాలు తీసేందుకు అంత‌టా ఆస‌క్తి చూపిస్తున్నార‌ని అన్నారు. హాలీవుడ్ నుంచి బాలీవుడ్‌కి, అట్నుంచి టాలీవుడ్‌కి ఈ అల‌వాటు వ‌చ్చింది. ఇది ఇప్ప‌టిది కాదు. ఎప్ప‌టినుంచో ఉన్న‌దే. అయితే ఇటీవ‌ల కాస్తంత ఉధృతి పెరిగింద‌ని సెల‌విచ్చారు. సూప‌ర్‌హిట్ సినిమాల‌కు ఫ్రాంఛైజీలు ఉండ‌డం త‌ప్పు లేద‌ని అభిప్రాయం చెప్పారు. పందెంకోడి 2 ని దాదాపు 13 ఏళ్ల త‌ర్వాత తీస్తున్నా.. ఇప్ప‌టికీ పందెంకోడి అభిమానుల్లో డిస్క‌ష‌న్ సాగుతూనే ఉండ‌డం త‌మ‌కు క‌లిసొస్తుంద‌ని అన్నారు. పందెంకోడి పాత్ర‌లు సీక్వెల్‌లో క‌నిపిస్తాయి. పెర్ఫెక్ట్ సీక్వెల్ ఇద‌ని తెలిపారు. ఈనెల 18న ప్ర‌పంచ‌వ్యాప్తంగా సినిమా రిలీజ‌వుతోంది. పెద్ద విజ‌యం అందుకుంటామ‌ని ధీమాని వ్య‌క్తం చేశారు.

ఇంత‌కీ `పందెంకోడి` ఫ్రాంచైజీ లో పార్ట్ 3 తీస్తున్నారా? మొన్న ప్రీరిలీజ్ ఈవెంట్‌లో విశాల్ ప్ర‌క‌టించారు క‌దా? అని ప్ర‌శ్నిస్తే.. పార్ట్ 3 తీస్తున్నాం. అయితే ఇప్ప‌టివ‌ర‌కూ లైన్ అనుకున్నాం. అది అందరికీ న‌చ్చింది. త‌ర్వాత ప్రొసీడింగ్స్ ఏవీ ఇంకా మొద‌లు కాలేదు. ప్ర‌స్తుతం `పందెంకోడి 2` ప్ర‌మోష‌న్ ప‌నిలో ఉన్నాం. ఈ ద‌స‌రా పందెంలో మ‌రో హిట్టు రాబోతోంది. పందెంకోడి సిస‌లైన యాక్ష‌న్ డ్రామా ఉన్న సినిమా. యాక్ష‌న్ కంటే ఫ్యాక్ష‌న్ కంటే డ్రామా ఆక‌ట్టుకుంటుంది. జాత‌ర బ్యాక్‌డ్రాప్‌లో రెండు ఊళ్ల మ‌ధ్య ఘ‌ర్ష‌ణ‌, స‌మ‌స్య ఏంటి? అన్న‌ది తెర‌పై చూడండి.. అని అన్నారు. హైద‌రాబాద్ - ప్ర‌సాస‌న్ న‌గ‌ర్‌లోని ఠాగూర్ మ‌ధు ఆఫీస్‌లో జ‌రిగిన ఇంట‌ర్వ్యూలో ఆయ‌న ప‌లు ఆస‌క్తిక‌ర సంగ‌తుల్ని రివీల్ చేశారు.