జోకులు మీమ్ లతో నిర్మాత‌ను ఆడుకున్నారు!

ప్ర‌ముఖ ద‌ర్శ‌క‌నిర్మాత కరణ్ జోహార్ పై అంతర్జాలంలో ర‌క‌ర‌కాల జోకులు ఛ‌లోక్తులు వేడెక్కిస్తున్నాయి. అత‌డు ఏం చేసినా యూత్ లో ఒక సెక్ష‌న్ ఆట ప‌ట్టిస్తూ ఉండ‌టం కామ‌న్ అయినా కానీ ఈసారి అందుకు భిన్నంగా అత‌డిని కామెడీ చేసేస్తుండ‌డం మీడియాలో చ‌ర్చ‌కు వ‌చ్చింది.

తాజాగా రిలీజైన‌ ఒక పాట క‌ర‌ణ్ పై జోకులు పేల్చేందుకు కార‌ణ‌మైంది. క‌ర‌ణ్ జోహార్ నిర్మిస్తున్న మోస్ట్ అవైటెడ్ రొమాంటిక్ కామెడీ 'జగ్ జగ్ జియో' త్వరలో థియేటర్లలోకి రానుంది. తాజాగా ఈ చిత్రంలోని 'దుపట్టా' అనే పాటను చిత్రనిర్మాత క‌ర‌ణ్ జోహార్ విడుద‌ల చేసారు.

దుపట్టా అనేది పాపీ స్టైల్ డ్యాన్స్ సాంగ్.. ఇది ఒక ర‌కంగా రీమిక్స్ లాంటిది. ఈ పాట ఆద్యంతం నిజానికి దుపట్టా (స్కార్ఫ్) చుట్టూ తిరుగుతుంది. అయితే మొత్తం పాటలో ఒక్కసారి కూడా దుపట్టా ఉపయోగించకపోవడంతో అభిమానులు చాలా వింత‌గా ఉందంటూ కామెంట్లు చేస్తున్నారు. ఒక ర‌కంగా కొరియోగ్రాఫ‌ర్ కి ప‌డాల్సిన అక్షింత‌లు క‌ర‌ణ్ జోహార్ కి ప‌డిపోతున్నాయ్.

సోషల్ మీడియాల్లో నెటిజ‌నులు కరణ్ జోహార్ ను ఒక రేంజులో ట్రోల్ చేయడం ప్రారంభించారు. చాలామంది స‌ర‌దా జోకులు మీమ్ లతో కామెంట్ సెక్షన్ లో వేడెక్కిస్తున్నారు. దుపట్టా ఎక్కడ తప్పిపోయింది క‌ర‌ణ్ జీ? అంటూ ఒక నెటిజ‌నుడు అడిగారు. ఒక ట్విట్టర్ యూజర్ ఫిల్మ్ మేకర్ క‌ర‌ణ్ ని ''దుపట్టా ఎక్కడ ఉంది బ్రో?'' అని అడిగాడు.

బ్రూహ్ క‌నీస మాత్రంగా అయినా వీడియోలో సింబాలిక్ దుపట్టా క‌నిపించ‌లేదు? అని వేరొక నెటిజ‌న్ ప్ర‌శ్నించాడు. దుప‌ట్టా థీమ్ తో వ‌చ్చిన పాట‌లో అస‌లు దుప‌ట్టా క‌నిపించ‌క‌పోవ‌డం విచిత్ర‌మే. కొరియోగ్రాఫ‌ర్ కి ఇదేదీ ఐడియా లేదా? అంటూ అంతా ఆశ్చ‌ర్య‌పోతున్నారు.

ఇంతకు ముందు ఈ చిత్రంలోని మరో రెండు పాటలు 'నాచ్ పంజాబన్'.. 'రంగీ సారీ' విడుదలయ్యాయి. ఇవి రెండూ పాత బాలీవుడ్ ట్రాక్ లకు రీమిక్స్ సాంగ్స్. ఒరిజినల్ మ్యూజిక్ ట్రాక్ లకు బదులుగా క‌ర‌ణ్‌ జోహార్ తన చిత్రానికి కాపీ పాటలను మాత్రమే ఎంచుకున్నారని కొంద‌రు నెటిజ‌నులు ఆవేదనను వ్య‌క్తం చేస్తున్నారు. జ‌గ్ జ‌గ్ జియో త్వ‌ర‌లో విడుద‌ల కానుంది. అదే క్ర‌మంలో క‌ర‌ణ్- ధావ‌న్ జోడీ ప్ర‌మోష‌న్స్‌ లో వేడిని పెంచింది.