రాజమౌళి.. వాళ్లలో ఎవరిని ఎంచుకుంటాడు?

‘బాహుబలి’ తర్వాత రాజమౌళి ఎవరితో ఎలాంటి సినిమా చేయబోతున్నాడని దేశవ్యాప్తంగా చర్చ నడుస్తోంది. అన్ని ఇండస్ట్రీల వాళ్లు జక్కన్న తర్వాతి సినిమా కోసం ఉత్కంఠగా ఎదురు చూస్తున్నారు. ఐతే తన తర్వాతి సినిమా విషయంలో రాజమౌళికే క్లారిటీ లేనట్లుగా అనిపిస్తోంది. ప్రస్తుతానికి విశ్రాంతి కోరుకుంటూ భూటాన్ వెళ్లిపోయాడు. అక్కడి నుంచి తిరిగొచ్చాక రాజమౌళి ఎలాంటి కథను.. ఏ హీరోను ఎంచుకుంటాడో కానీ.. ఆయన వచ్చేసరికి ఇంటిముందు నిర్మాతలు మాత్రం క్యూ కట్టేయబోతున్నారు. రాజమౌళితో సినిమా చేయాలని చాలామంది ప్రయత్నిస్తుండగా.. కనీసం అరడజను మంది కొంచెం గట్టి ప్రయత్నమే చేస్తున్నారు. ‘బాహుబలి’ తర్వాత రాజమౌళి సినిమాకు ఏ స్థాయి హైప్ ఉంటుందో తెలిసిందే కాబట్టి ఆ సినిమాను తామే దక్కించుకోవాలని ఆరాటపడుతున్నారు నిర్మాతలు.

స్టార్ ప్రొడ్యూసర్ డీవీవీ దానయ్య రాజమౌళి తర్వాతి సినిమాను నిర్మించేందుకు ఫ్రంట్ రన్నర్ అంటున్నారు. ఆయనకు రాజమౌళి ఎప్పుడో కమిట్మెంట్ ఇచ్చాడట. ప్రస్తుతం మహేష్ బాబు-కొరటాల శివ సినిమా షూటింగ్ ప్రారంభోత్సవానికి ఏర్పాట్లు చేసుకుంటున్న దానయ్య.. రాజమౌళి ఓకే అంటే దాని పనులు వేరొకరికి అప్పగించి ఈ ప్రాజెక్టుపైకి వచ్చేయడానికి సిద్ధంగా ఉన్నాడు. మరోవైపు సీనియర్ ప్రొడ్యూసర్ కేఎల్ నారాయణకు కూడా రాజమౌళి చాలా ఏళ్ల కిందటే కమిట్మెంట్ ఇచ్చాడట. ఇంకోవైపు ‘బాహుబలి’ని హిందీలో అందించిన కరణ్ జోహార్ సైతం నేరుగా జక్కన్నతో ఓ సినిమా చేయాలని ఆరాట పడుతున్నాడు. రాజమౌళిపై కొన్ని రోజులుగా బాగా ఒత్తిడి తెస్తున్నాడట కరణ్. ‘బాహుబలి’ నిర్మాతలు శోభు యార్లగడ్డ.. ప్రసాద్ దేవినేని సైతం జక్కన్నతో ఇంకో సినిమా కోసం ఆశ పడుతున్నారు. వీళ్లు కాక రాజమౌళికి సన్నిహితుడైన ‘వారాహి చలనచిత్రం’ అధినేత సాయి కొర్రపాటి కూడా లైన్లో ఉన్నట్లు సమాచారం. మరోవైపు వేరే ఇండస్ట్రీల నుంచి మరింతమంది నిర్మాతలు రాజమౌళితో సినిమా కోసం ప్రయత్నాలు చేస్తున్నట్లు తెలుస్తోంది. మరి వీళ్లలో రాజమౌళితో సినిమా చేసే బంపరాఫర్ ఎవరికి దక్కుతుందో చూడాలి.

Like Us on Facebook : https://www.facebook.com/Tupakidotcom/