రవితేజ అడిగినంత రెమ్యునరేషన్ ఇవ్వడానికి కారణం అదేనా..?

'క్రాక్' సినిమాతో బ్లాక్ బస్టర్ అందుకుని సక్సెస్ ట్రాక్ ఎక్కిన మాస్ మహారాజా రవితేజ.. వరుసగా సినిమాలను లైన్ లో పెడుతున్నారు. బ్యాక్ టూ బ్యాక్ ప్రాజెక్ట్స్ కు సైన్ చేస్తూ.. ఒక సినిమా షూటింగ్ దశలో ఉండగానే మరో చిత్రాన్ని సెట్స్ మీదకు తీసుకొస్తూ బిజీబిజీగా గడుపుతున్నారు.

ప్రస్తుతం రవితేజ చేతిలో ఐదు సినిమాలు ఉన్నాయి. ఇవి కాకుండా మరికొన్ని ప్రాజెక్ట్స్ చర్చల దశలో ఉన్నాయని తెలుస్తోంది. మాస్ రాజా వెంటనే డేట్స్ ఇచ్చేందుకు ఒప్పుకుంటే భారీ రెమ్యునరేషన్స్ ఇవ్వడానికి ప్రొడ్యూసర్స్ రెడీ అవుతున్నారు.

రవితేజ ఊ అంటే పారితోషకంగా 15 నుంచి 20 కోట్ల రూపాయలు కూడా ఇవ్వడానికి నిర్మాతలు సిద్ధమవున్నారని టాక్ నడుస్తోంది. గత చిత్రం 'ఖిలాడి' బాక్సాఫీస్ వద్ద ప్లాప్ అయినప్పటికీ.. సీనియర్ హీరో డిమాండ్ తగ్గకపోవడానికి కారణం అతని నాన్ థియేట్రికల్ మార్కెట్ అని అంటున్నారు.

హిందీ మార్కెట్‌ లో మంచి క్రేజ్ ఉన్న సౌత్ ఇండియన్ హీరోలలో రవితేజ కూడా ఒకరు. మాస్ రాజా నటించే సినిమాల హిందీ డబ్బింగ్ వెర్షన్స్ నార్త్ లో మంచి ఆదరణ లభిస్తుంది. టీవీ ఛానల్స్ లో మంచి టీఆర్పీ రాబడుతుంటాయి. యూట్యూబ్ లో మిలియన్ల వ్యూస్ సాధిస్తుంటాయి.

హిందీ మార్కెట్ ధరల పెంపు మరియు ఓటీటీ రైట్స్ కారణంగా.. ఒకవేళ సినిమా ఫలితం కొంచం అటు ఇటు అయినా నాన్-థియేట్రికల్ తో సేఫ్ జోన్ లో ఉండొచ్చు. ఇవన్నీ ఆలోచించుకునే నిర్మాతలు మాస్ మహారాజ్‌ కి భారీ రెమ్యూనరేషన్ ఇవ్వడానికి ముందుకి వస్తున్నారని అనుకుంటున్నారు.

రవితేజ ప్రస్తుతం శరత్ మండవ దర్శకత్వంలో ''రామారావు ఆన్ డ్యూటీ'' అనే సినిమాలో నటిస్తున్నారు. శ్రీ లక్ష్మీ వెంకటేశ్వర సినిమాస్ బ్యానర్ పై RT టీమ్ వర్క్స్ సహకారంతో సుధాకర్ చెరుకూరి ఈ చిత్రాన్ని నిర్మిస్తున్నారు. ప్రస్తుతం పోస్ట్ ప్రొడక్షన్ పనుల్లో ఉన్న ఈ సినిమా విడుదల తేదీని త్వరలోనే ప్రకటించనున్నారు.

అలానే టాలెంటెడ్ డైరెక్టర్ సుధీర్ వ‌ర్మ దర్శకత్వంలో ''రావ‌ణాసుర'' అనే సినిమా చేస్తున్నారు రవితేజ. ఇందులో అక్కినేని హీరో సుశాంత్ కీలక పాత్ర పోషిస్తున్నారు. అభిషేక్ పిక్చర్స్ మరియు ఆర్టీ టీమ్ వర్క్స్ బ్యానర్స్ పై అభిషేక్ నామా భారీ బడ్జెట్ తో ఈ చిత్రాన్ని నిర్మిస్తున్నారు.

మాస్ మహారాజా లైన్ లో పెట్టిన చిత్రాల్లో ''ధమాకా'' ఒకటి. త్రినాథ రావు నక్కిన దర్శకత్వం వహిస్తున్న ఈ అవుట్ అండ్ అవుట్ ఎంటర్టైనర్ కు 'డబుల్ ఇంపాక్ట్' అనేది ట్యాగ్ లైన్. పీపుల్స్ మీడియా ఫ్యాక్టరీ మరియు అభిషేక్ అగర్వాల్ ఆర్ట్స్ బ్యానర్స్ పై టీజీ విశ్వ ప్రసాద్ - వివేక్ కూచిభొట్ల ఈ మూవీని నిర్మిస్తున్నారు.

ఇక రవితేజ నటిస్తున్న పాన్ ఇండియా మూవీ ''టైగర్ నాగేశ్వరరావు''. వంశీ దర్శకత్వంలో ఈ సినిమా తెరకెక్కుతోంది. స్టూవర్ట్ పురంలో పేరుమోసిన గజదొంగ టైగర్ నాగేశ్వరరావు జీవిత కథ ఆధారంగా ఈ సినిమా రూపొందుతోంది. తేజ్ నారాయణ్ అగర్వాల్ సమర్పణలో అభిషేక్ అగర్వాల్ ఆర్ట్స్ పై అభిషేక్ అగర్వాల్ ఈ చిత్రాన్ని నిర్మిస్తున్నారు.

ఇదే క్రమంలో మెగాస్టార్ చిరంజీవి మరియు డైరెక్టర్ బాబీ కాంబినేషన్ లో రూపొందుతోన్న 'వాల్తేరు వీరయ్య' సినిమాలో రవితేజ కీలక పాత్ర పోషించనున్నటు వార్తలు వస్తున్నాయి. మైత్రీ మూవీ మేకర్స్ పతాకంపై ఈ మాస్ అండ్ యాక్షన్ ఎంటర్టైనర్ తెరకెక్కుతోంది.