సినిమా పోయింది.. ఛాన్సు మిస్సయ్యింది

హీరోగా సునీల్ కు ఈ మధ్య టైం అస్సలు కలిసిరావడం లేదు. హిట్ అన్నది అందని ద్రాక్షయి పోయింది. వరస ఫ్లాపులతో అతడి ఇమేజ్ గ్రాఫ్ అమాంతం పడిపోయింది. ఈమధ్య వచ్చిన ప్రతి సినిమాకు తాను బౌన్స్ బ్యాక్ అవతానని సునీల్ చెబుతూనే ఉన్నాడు. కానీ వచ్చిన సినిమాలు వచ్చినట్టు రోజుల్లోనే వెనక్కి తిరిగి వెళ్లిపోతున్నాయి.

సునీల్ లేటెస్ట్ ఫిలిం ఉంగరాల రాంబాబుపై చాలా ఆశలే పెట్టుకున్నాడు. కానీ ఆ సినిమా ఏ రకంగానూ ప్రేక్షకులను ఆకట్టుకోలేకపోయింది. ‘ఓనమాలు’.. ‘మళ్ళీ మళ్ళీ ఇది రాని రోజు’ లాంటి సినిమాలు తీసి మంచి దర్శకుడిగా పేరు తెచ్చుకున్న క్రాంతి మాధవ్ డైరెక్షన్ లో వచ్చిన సినిమా డిజాస్టర్ గా పేరు తెచ్చుకుంది. దీని ప్రభావం సునీల్ తర్వాత చేయాల్సిన సినిమాపైనా పడింది. సునీల్ తన తర్వాత మూవీ కొత్త దర్శకుడు గోపీకృష్ణ డైరెక్షన్ లో చేయాల్సి ఉంది. నానీ హీరోగా వచ్చిన జంటిల్ మేన్ మూవీ ప్రొడ్యూసర్ శివలెంక కృష్ణప్రసాద్ గతంలో తమిళంలో సూపర్ హిట్ అయిన చతురంగ వేట్టై సినిమా ను తెలుగులో సునీల్ తో రీమేక్ చేద్దామనుకున్నాడు. కానీ ఉంగరాల రాంబాబు రిజల్ట్ చూశాక దర్శక - నిర్మాతలు తమ నిర్ణయంపై పునరాలోచనలో పడ్డట్టు తెలుస్తోంది.

చతురంగ వేట్టై థ్రిల్లర్ మూవీ. అయితే సునీల్ కు కామెడీ కొట్టిన పిండి. ఆ జోనర్ లో అతడికి అభిమానులు ఎక్కువగా ఉన్నారు. కామెడీ ఎంటర్ టెయినర్లే బాక్సాఫీస్ వద్ద బోల్తా పడుతుంటే థ్రిల్లర్ తీయడమంటే మరీ సాహమేనని చెప్పాలి. అందుకే నిర్మాతలు వెనక్కి తగ్గినట్టు టాలీవుడ్ వర్గాల భోగట్టా. మొత్తానికి ఉంగరాల రాంబాబు సునీల్ ను గట్టి దెబ్బే కొట్టినట్టున్నాడు.