30 ఇయర్స్ పృథ్వీ.. హాట్ అంటే హాట్

కొందరు హఠాత్తుగా స్టార్లయిపోతారు.. కొందరు ఒక్కో మెట్టూ ఎక్కి పై స్థాయికి చేరతారు. హీరోల్లో మాత్రమే కాదు.. కమెడియన్లలోనూ ఇలా రెండు రకాల వాళ్లూ ఉంటారు. ఈ రెండో కేటగిరికి చెందిన నటుడే 30 ఇయర్స్ పృథ్వీ. ఖడ్గం సినిమాలో 30 ఇయర్స్ ఇండస్ట్రీ అనే ఊతపదంలో పాపులరైన పృథ్వీ.. నిజంగానే 30 ఏళ్లుగా ఇండస్ట్రీలో ఉండటం విశేషం. ఐతే అతడికి సరైన బ్రేక్ రావడానికి చాలా ఏళ్లే పట్టింది. గత ఏడాది ‘లౌక్యం’ సినిమాలో బాయిలింగ్ స్టార్ బబ్లూ పాత్రతో అతడి దశ తిరిగింది. సరిగ్గా బ్రహ్మానందం డౌన్ అయిపోతున్న సమయంలోనే రైజ్ అయిన పృథ్వీ నెమ్మదిగా ఆ స్టార్ కమెడియన్ ప్లేస్ ను రీప్లేస్ చేసే స్థాయికి ఎదుగుతున్నాడు.

శుక్రవారం ప్రేక్షకుల ముందుకొచ్చిన ‘శంకరాభరణం’ సినిమాకు డివైడ్ టాక్ వచ్చినప్పటికీ.. ఈ సినిమాలో అందరినీ ఆకట్టుకున్నది పృథ్వీ క్యారెక్టరే. పర్సంటేజ్ పరమేశ్ గా తనదైన కామెడీ టైమింగ్, పంచ్ పవర్ తో చెలరేగిపోయాడు పృథ్వీ. ముఖ్యంగా సెకండాఫ్ సినిమా అంతా పృథ్వీ కామెడీ మీదే నడిచింది. సినిమాలో అందరినీ డామినేట్ చేస్తూ తనదైన శైలిలో నవ్వించాడు పృథ్వీ. చివరికి సినిమా రిజల్ట్ గురించి చెప్పమంటే పృథ్వీ కోసం చూడొచ్చు అని ఆడియన్స్ అంటున్నారంటే జనాలు అతడి కామెడీతో ఎలా కనెక్టయ్యారో అర్థం చేసుకోవచ్చు. శుక్రవారం మరో విశేషం ఏంటంటే.. సాయంత్రం రిలీజైన ‘సౌఖ్యం’ ట్రైలర్లోనూ పృథ్వీనే హైలైట్ అయ్యాడు. అందులో బాహుబలికి స్పూఫ్ గా పృథ్వీ శివలింగాన్ని మోసే సీన్ కు సంబంధించిన ఫొటోస్, క్లిప్స్ సోషల్ మీడియాలో వైరల్ అయ్యాయి. మొత్తానికి ఒకే రోజు రెండు సినిమాల్లో తన ప్రత్యేకత చూపించి టాలీవుడ్లో హాట్ టాపిక్ అయ్యాడు పృథ్వీ.