‘150’లో కోత.. కమెడియన్ పృథ్వీ హర్టయ్యాడు

మెగాస్టార్ చిరంజీవి రీఎంట్రీ మూవీ ‘ఖైదీ నెంబర్ 150’ గురించి కొన్ని రోజులుగా రకరకాల రూమర్లు వినిపిస్తున్నాయి. ఈ సినిమా రీమేకే అయినప్పటికీ తెలుగు వెర్షన్ కోసం ప్రత్యేకంగా కొన్ని కామెడీ ట్రాక్స్ తెరకెక్కంచారని.. ఐతే చివరగా ఔట్ పుట్ చూసుకున్నపుడు వాటికి కోత వేసేశారని వార్తలు వస్తున్నాయి. ఈ వార్తల్లో వాస్తవమెంత అని అంతా చర్చించుకుంటుండగా స్టార్ కమెడియన్ పృథ్వీ లైన్లోకి వచ్చాడు. ‘ఖైదీ నెంబర్ 150’లో కామెడీ సీన్స్ తీసేశారంటూ మీడియాలో వచ్చిన వార్తల్ని షేర్ చేస్తూ తన ఆవేదనను వెళ్లగక్కాడు. ఆ కామెడీ సీన్లు తనపై తీసినవే అని.. వాటిని తీసేయడం చాలా బాధ కలిగించిందని పృథ్వీ చెప్పాడు.

‘‘చిరంజీవి గారి 150వ సినిమాలో నటించడం నా అదృష్టం. కానీ నాపై తీసిన సన్నివేశాల్ని తొలగించడం నా దురదృష్టం. సంక్రాంతి రోజు మా అమ్మ చనిపోయినపుడు ఎంత బాధ కలిగిందో ఇప్పుడు అంత బాధేస్తోంది’’ అని తన ఫేస్ బుక్ పేజీలో మెసేజ్ పెట్టాడు పృథ్వీ. ఈ సన్నివేశాలు తొలగిస్తున్న విషయం పృథ్వీ దర్శకుడు వినాయక్ సహా ఎవరూ చెప్పలేదని.. దీంతో ఆయన మరింత హర్టయ్యాడని అంటున్నాడు. మరోవైపు ఈ చిత్రంలో సీనియర్ కమెడియన్ బ్రహ్మానందం కూడా నటించాడని వార్తలొస్తున్నాయి. మరి ఆయనకు సంబంధించిన సన్నివేశాలైనా ఉంచారా లేక వాటికీ కోత వేశారా అన్నది తెలియడం లేదు. ‘ఖైదీ నెంబర్ 150’లో మరో సీనియర్ కమెడియన్ అలీ.. చిరు వెంటే ఉండే ఫుల్ లెంగ్త్ రోల్ చేశాడు. ఆలీ కామెడీతో సరిపెట్టేద్దామనివేరే కామెడీ ట్రాకులకు కోత వేసేశారేమో.

Like Us on Facebook : https://www.facebook.com/Tupakidotcom/