PSPK 26 వ‌రుస లీకులతో భేజారే

బాహుబ‌లి చిత్రం ప్ర‌పంచ‌వ్యాప్తంగా పాపులారిటీ ద‌క్కించుకుంది. దాంతో ఆ సినిమా రిలీజ్ అనంత‌రం ర‌క‌ర‌కాల బిజినెస్ లు పుట్టుకొచ్చాయి. అవ‌న్నీ వ‌ర్త‌కుల‌కు బోలెడంత రెవెన్యూ తెచ్చాయి. అయితే అలాంటి డిమాండ్ ప‌వ‌ర్ స్టార్ ప‌వ‌న్ క‌ల్యాణ్ కి ఉంటుంద‌న‌డంలో సందేహం లేదు. పీకే ఫ్యాన్స్ ప్ర‌పంచ‌వ్యాప్తంగా ఉన్నారు. ఆ క్రేజు వ‌ల్ల‌నే తాజాగా ప‌వ‌న్ రీఎంట్రీ పై విస్తృత‌మైన చ‌ర్చ సాగుతోంది.

ఇటీవ‌లే ఒక‌దాని వెంట ఒక‌టిగా రెండు సినిమాల్ని ప్రారంభించేశారు ప‌వ‌న్. పింక్ రీమేక్ స‌హా క్రిష్ ద‌ర్శ‌క‌త్వంలోని సినిమాని ప్రారంభించేశాడు. ప‌వ‌న్ హీరోగా హ‌రీష్ శంక‌ర్ సినిమాని మైత్రి సంస్థ ఖాయం చేసేసింది. ప్ర‌స్తుతం ఆదిత్య శ్రీ‌రామ్ ద‌ర్శ‌క‌త్వంలో పింక్ రీమేక్ సెట్స్ పై ఉంది. ఈ సినిమా ఇలా మొద‌లైందో లేదో అలా ఆన్ లొకేష‌న్ నుంచి ర‌క‌రకాల లీక్డ్ ఫోటోలు వైర‌ల్ అయిపోతున్నాయి. డే వ‌న్ లోనే ప‌వ‌న్ ఫోటోలు లీక‌వ్వ‌డంతో సోష‌ల్ మీడియా ఠారెత్తింది. ఆ త‌ర్వాత దిల్ రాజు బృందం కంగారు ప‌డి ఎంతో స్ట్రిక్టు రూల్స్ పాస్ చేశారు.

అయినా పీకే సినిమాకి సంబంధించిన లీకులేవీ ఇప్ప‌టికీ ఆగ‌డం లేదు. తాజాగా ఓ యాక్షన్ సీన్ లీకైంది. లాయ‌ర్ సాబ్ ఓ ఎమోష‌న‌ల్ డైలాగ్ చెబుతూ అటువైపు వాడికి అదిరిపోయే పంచ్ ఇస్తున్నాడు. ఈ వీడియోలో ప‌వ‌న్ మార్క్ డైలాగ్ ఆక‌ట్టుకుంది. ``ఎన్నేళ్లైనా ... ఎన్నాళ్లైనా నాలో ఆవేశం తగ్గ‌దు.. ఒక్కసారి నేను నల్ల కోటు వేసుకున్నాను అంటే.. వేసుకోవడానికి పిటిషలు ..తీసుకోవడానికి బెయిల్ లు ఉండవు`` అంటూ అదిరిపోయే డైలాగ్ చెప్పాడు. ఈ క్లిప్ ఇలా రిలీజైందో లేదో అలా జెట్ స్పీడ్ తో వైర‌ల్ అయిపోతోంది. ఈ లీకులే ఒక విచిత్రం అనుకుంటే.. ఆ లీకైన ఫోటోల్ని ముద్రించి పీకే పేరుతో టీష‌ర్టుల్ని విక్ర‌యించేస్తూ వెండ‌ర్స్ షాకిస్తున్నారు. ప్ర‌స్తుతం మార్కెట్లో ఈ త‌ర‌హా టీష‌ర్టుల‌కు పీకే అభిమానుల్లో మాంచి గిరాకీ ఏర్ప‌డింద‌ట‌. ష‌ర్ట్ ఆన్ లైన్ మార్కెట్లోకి రావాలే కానీ వెంట‌నే కొనేస్తున్నార‌ట‌. రెండేళ్ల గ్యాప్ వ‌చ్చినా పవన్ క్రేజ్‌కు ఇంత‌కంటే ఏం నిదర్శనం కావాలి? త‌న‌కు ఉన్న క్రేజును ఎన్ క్యాష్ చేసుకునే ఆలోచ‌న ఉంటే ప‌వ‌న్ ఈపాటికే అలాంటి ప‌ని చేసేవారే.. కానీ వ్య‌క్తిగ‌త నిబ‌ద్ధ‌త వ‌ల్ల క‌మ‌ర్షియ‌ల్ ప్ర‌క‌ట‌న‌లు చేయాలి అన్న ఆలోచ‌న‌ల‌కు చెక్ ప‌డిపోయిందని అభిమానులు చెబుతుంటారు.