వరలక్ష్మి శరత్ కుమార్ నుంచి సైకలాజికల్ థ్రిల్లర్!

సరైన సమయంలో సరైన నిర్ణయం తీసుకోవడం పైనే కెరియర్ ఆధారపడి ఉంటుందని ఇండస్ట్రీలోని సీనియర్స్ అనుభవపూర్వకంగా చెబుతుంటారు. అలా సరైన సమయంలో సరైన నిర్ణయం తీసుకోవడం వల్లనే వరలక్ష్మి శరత్ కుమార్ ఫుల్ బిజీ అయిపోయింది. శరత్ కుమార్ వంటి స్టార్ హీరో వారసురాలిగా .. హీరోయిన్ గా స్టార్ డమ్ ను సంపాదించడం కష్టమేననే విషయం అర్థమైపోగానే ఆమె ఎంత మాత్రం ఆలస్యం చేయలేదు. వెంటనే నెగెటివ్ షేడ్స్ తో కూడిన పాత్రలను చేయడానికి సిద్ధమైపోయింది.

చాలా తక్కువ సమయంలోనే తమిళంలో స్టార్ హీరోలతో తలపడే లేడీ విలన్ పాత్రలలో సైతం మెప్పించింది. ఇక అదే తరహా పాత్రలు తెలుగులోను చేస్తూ ఇక్కడి ప్రేక్షకులకు చేరువైంది. ఇప్పుడు ఆమె బాలకృష్ణ - గోపీచంద్ మలినేని కాంబినేషన్లోని సినిమాలో ఒక పవర్ఫుల్ పాత్రను పోషిస్తోంది. అలాగే సమంత ప్రధానమైన పాత్రను పోషిస్తున్న 'యశోద' సినిమాలోను ఒక కీలకమైన పాత్రను చేస్తోంది. ఈ రెండు సినిమాలు కూడా ఈ ఏడాదిలోనే ప్రేక్షకుల ముందుకు రానున్నాయి.

ప్రస్తుతం వరలక్ష్మి శరత్ కుమార్ ఓ బహు బాషా చిత్రం కూడా చేస్తోంది .. ఆ సినిమా పేరే 'శబరి'. 'ఉగాది' పండుగ రోజున ఈ సినిమా నుంచి కాన్సెప్ట్ పోస్టర్ ను వదిలారు. వరలక్ష్మి శరత్ కుమార్ ను ఏవో జ్ఞాపకాలు వెంటాడుతున్నట్టుగా .. ఆమెలో ఆలోచనల అంతర్మథనం జరుగుతున్నట్టుగా ఈ పోస్టర్ ను బట్టి అర్థమవుతోంది. ఈ పోస్టర్ లో ఒక బేబీ కూడా కనిపిస్తోంది. అది వరలక్ష్మీ శరత్ కుమార్ బాల్యానికి సంబంధించినదా? లేదంటే ఒక బిడ్డకి తల్లిగా ఆమె ఈ పోస్టర్లో కనిపించనుందా? అనేది ఆసక్తికరంగా మారింది.

'ఎవరూ మమ్మల్ని విడదీయలేరు' అంటూ పోస్టర్ పై ఉన్న సింగిల్ లైన్ ఉత్కంఠను పెంచుతోంది. మొత్తానికైతే ఈ పోస్టర్ .. టైటిల్ రెండూ కూడా సినిమాపై ఆసక్తిని పెంచుతున్నాయి.

సైకలాజికల్ థ్రిల్లర్ గా రూపొందుతున్న ఈ సినిమాను మహా మూవీస్ బ్యానర్ పై మహేంద్రనాథ్ నిర్మిస్తూ ఉండగా, అనిల్ దర్శకత్వం వహిస్తున్నాడు. గోపీసుందర్ ఈ సినిమాకి సంగీతాన్ని సమకూర్చుతున్నాడు.

గణేశ్ వెంకట్రామన్ .. శశాంక్ .. గోపీ ముఖ్యమైన పాత్రల్లో కనిపించనున్నారు. తమిళంతో పాటు తెలుగు .. మలయాళ .. హిందీ భాషల్లో ఈ సినిమాను విడుదల చేయనున్నారు. చూస్తుంటే ఈ సినిమా వరలక్ష్మి కెరియర్లో ప్రత్యేకమైనదిగా నిలుస్తుందనే అనిపిస్తోంది.