వీడియో: పునీత్ `నాటు నాటు` దుమారం

RRR నుండి నాటు నాటు ఇటీవ‌ల‌ `ట్రెండింగ్`లో ఉన్న‌ సంగ‌తి తెలిసిందే. 3 కోట్ల వీక్ష‌ణ‌ల‌కు చేరువైంది ఈ పాట‌. మాస్ ట్రాక్.. నాటు నాటు అది విడుదల చేసిన అన్ని భాషల్లో ఇన్ స్టంట్ చార్ట్ బస్టర్ గా మారింది. ముఖ్యంగా ఈ పాటలో జూనియర్ ఎన్టీఆర్- రామ్ చరణ్ ల మైండ్ బ్లోయింగ్ స్టెప్పులకు జనాలు ఫిదా అవుతున్నారు. ఈ పాటను పెద్ద తెర‌పై వీక్షించేందుకు అభిమానులు ఎంతో ఉత్కంఠగా వేచి చూస్తున్నారు.

నాటు నాటు పాట‌కు మ‌రో ర‌కంగానూ బోలెడంత ప‌బ్లిసిటీ వ‌స్తోంది. తార‌క్- చ‌ర‌ణ్ రేంజులో నాటు స్టెప్పుల‌తో మాస్ ని అల‌రించిన ప్ర‌ముఖ క‌న్న‌డ స్టార్ హీరో పునీత్ రాజ్ కుమార్ స్టెప్పుల్ని మ్యాచ్ చేస్తూ నాటు నాటు ట్యూన్ ని స‌ద్వినియోగం చేసిన తీరు ఆక‌ట్టుకుంటోంది. చాలా మంది నెటిజనులు తమ అభిమాన స్టార్ హీరోల మాష‌ప్ సాంగ్స్ కి నాటు నాటు ట్యూన్ ని జోడిస్తున్నారు. వీటిలో కొన్ని క్లిప్ లు సోషల్ మీడియాలో వైరల్ అయ్యాయి. పునీత్ రాజ్ కుమార్ డ్యాన్సుల‌తో నాటు నాటు కన్నడ వెర్షన్ మాషప్ ఈ త‌ర‌హానే.

పునీత్ గొప్ప అథ్లెట్ కం డ్యాన్సర్.. అత‌డి డ్యాన్సుల్లో బాడీ లాంగ్వేజ్ లో ఫ్లెక్సిబిలిటీ మైండ్ బ్లోయింగ్ అనాల్సిందే. మైఖేల్ జాక్స‌న్ స్ఫూర్తితో అత‌డు మూన్ వాక్ ని అద‌ర‌గొడ‌తాడు. ఇక తార‌క్ చ‌ర‌ణ్ ల‌కు ధీటుగా డ్యాన్సులు చేయ‌గ‌ల ప్ర‌తిభావంతుడిగా నిరూపించుకున్నారు. కొంద‌రు అభిమానులు అయితే అంత‌కుమించి నృత్య కదలికలను ప్రదర్శించగ‌ల ధీశాలి అని పొగిడేస్తారు.

అతను భారతీయ చలనచిత్ర పరిశ్రమలో అత్యుత్తమ నృత్యకారులలో ఒకడు. దురదృష్టవశాత్తు అతను గత నెలలో ఆక‌స్మిక గుండె పోటు కారణంగా మరణించాడు. అతని అభిమానులు నాటు నాటు మాష‌ప్ వీడియోల‌తో సంస్మ‌రించుకోవ‌డం హృద‌యాల్ని ట‌చ్ చేస్తోంది. ప్ర‌స్తుతం ఈ వీడియో ఇంటర్నెట్ అంతటా వైరల్ అవుతోంది. అది చివ‌రికి RRR టీమ్ కి కూడా చేరింది. ఇది అద్భుతమైన కూర్పు అంటూ ఆర్.ఆర్.ఆర్ టీమ్ ప్ర‌శంసించింది. ఆర్.ఆర్.ఆర్ సంక్రాంతి బ‌రిలో విడుద‌ల‌వుతున్న సంగ‌తి తెలిసిందే. ఇది దాదాపు 10 భాషల్లో విడుద‌ల‌వుతుంద‌ని ఇప్ప‌టికే ప్ర‌చారం ఉంది.