కన్నీళ్లు పెట్టిస్తున్న పునీత్-రాజ్‌కుమార్ ఫొటో

పునీత్ రాజ్ కుమార్ మరణం కోట్లాదిమంది అభిమానులనే కాక అందరినీ కదిలించేసింది. సినిమా హీరోగా ఉన్న ఆకర్షణకు తోడు గొప్ప వ్యక్తిత్వం వల్ల పునీత్ మరణం మరింతగా జనాల్ని కదిలించింది. అతనెంత మంచివాడో.. అంత పెద్ద స్టార్ అయినా ఎంత అణకువతో, ఎంత సింపుల్‌గా ఉండేవాడో.. ఎంత భారీ స్థాయిలో సేవా కార్యక్రమాలు చేస్తున్నాడో మరణానంతరం మరింతగా జనాలకు తెలిసింది. తన గురించి ఎన్నో మంచి విషయాలు బయటికి వచ్చాయి.

దీంతో భాషా భేదం లేకుండా ఇతర రాష్ట్రాల వాళ్లు కూడా పునీత్ మరణం పట్ల విచారం వ్యక్తం చేశారు. పునీత్ చనిపోయినప్పటి నుంచి కొన్ని ఫొటోలు, వీడియోలు సోషల్ మీడియాలో బాగా వైరల్ అయ్యాయి. ప్రముఖ కార్టూనిస్ట్ సతీష్ ఆచార్య వేసిన ఒక కార్టూన్ అయితే అందరినీ కదిలించేసింది. పైన స్వర్గంలో ఉన్న రాజ్ కుమార్.. కన్నీళ్లు పెట్టుకుంటూ కొడుకును తన దగ్గరికి తీసుకోబోతూ.. ''కొడుకా ఎందుకింత తొందరపడ్డావ్'' అంటున్నట్లుగా ఉన్న కార్టూన్ అది.

అది సోషల్ మీడియాలో విపరీతంగా వైరల్ అయింది. ఇప్పుడు ఓ అభిమాని ఎవరో క్రియేట్ చేసిన మరో ఫొటో వైరల్ అవుతోంది. రాజ్ కుమార్, పునీత్‌ అభిమానులతో కన్నీళ్లు పెట్టిస్తోంది. పైన స్వర్గంలో కూర్చుని ఉన తన తండ్రి వెనుక నిలబడి ఆయన కళ్లు మూసి ఎవరో చెప్పుకోండి చూద్దాం అన్నట్లుగా క్రియేట్ చేసిన ఫొటో ఇది. చాలా హృద్యంగా అనిపిస్తున్న ఈ ఫొటోను కన్నడ సినీ ప్రముఖులు, అభిమానులు సోషల్ మీడియా ప్రొఫైల్స్‌లో డీపీగా పెట్టుకుంటున్నారు. ఇదిలా ఉంటే.. పునీత్ కడసారి చూపు చూసుకోలేకపోయిన అభిమానులను ఇప్పుడు అతడి సమాధి వద్దకు అనుమతిస్తున్నారు. రోజూ వేలమంది అక్కడికి వస్తున్నారు. మరోవైపు రామ్ చరణ్, సూర్య సహా పలువురు ప్రముఖులు పునీత్ కుటుంబ సభ్యులను పరామర్శిస్తున్నారు.