మళ్లీ కొడుకుతోనే ఆ దర్శకుడు!!

కొత్త హీరోలను లాంఛ్ చేయడం అంటే.. ఈ జనరేషన్ లో దర్శకుడు పూరీ జగన్నాధ్ తర్వాతే ఇంకెవరైనా. అందుకే పలు భాషల నుంచి తమ కుర్రాళ్లను హీరోలుగా మార్చమంటూ పూరీకి పిలుపులు వస్తుంటాయి. కుదిరితే పూరీనే వీటిని తెరకెక్కిస్తుంటాడు.. లేదా పూరీ తీసిన ఓ హిట్టు సినిమా స్టోరీ రైట్స్ కొనుక్కోవడం ఆనవాయితీ అయిపోయింది.

గత కొంతకాలంగా బ్యాడ్ టైం ఎదుర్కొంటున్న పూరీ జగన్నాధ్.. ప్రస్తుతం తన కొడుకు ఆకాష్ నే హీరోగా లాంఛ్ చేయడంలో బిజీగా ఉన్నాడు. మెహబూబా అంటూ రూపొందిస్తున్న మూవీ కోసం తన శాయశక్తులు అన్నీ ఒడ్డుతున్నాడు పూరీ. కొన్ని నెలలుగా ఈ సినిమా షూటింగ్ జరుపుకుంటూ ఉండగా.. ఇప్పుడు తన తర్వాతి ప్రాజెక్టు కోసం కూడా పనులు మొదలుపెట్టేస్తున్నాడట ఈ ఫుల్ స్పీడ్ డైరెక్టర్. చక చకా సినిమాలు చేసేసే పూరీ నెక్ట్స్ సినిమాలో హీరో ఎవరా అని ఆరా తీస్తే.. ఆ చిత్రం కూడా తన కుమారుడు హీరోగానే చేయాలని పూరీ డిసైడ్ చేసుకోవడం ఆశ్చర్యంలో పడేసే విషయం.

సహజంగా పూరీ జగన్నాధ్ వరుసగా ఒకే హీరోతో సినిమాలు చేసిన హిస్టరీ లేదు. ప్రారంభంలో ఇట్లు శ్రావణి సుబ్రమణ్యం.. ఈడియట్ సినిమాలు రవితేజతో చేసినా.. ఈడియట్ ను అప్పటికే అప్పటికే కన్నడలో పునీత్ రాజ్ కుమార్ తో తీసేశాడు. అదే సినిమాను మళ్లీ తెలుగులో దించాడంతే. అయితే.. తన స్టైల్ కు తగినట్లుగా ఆకాష్ మారిపోతున్న తీరు.. సీన్ కు అనుగుణంగా ఒదిగిపోతున్న వైనం పూరీని ఆకట్టుకున్నాయట. అందుకే మొదటిసారి ఓ హీరోను తన తర్వాతి సినిమాలో కూడా తీసుకోనున్నాడట పూరీ జగన్నాధ్.