బాలయ్య-పూరి.. శాటిలైట్ ఫినిష్

పూరి జగన్నాథ్.. నందమూరి బాలకృష్ణ కాంబినేషన్లో ఒక సినిమా వస్తుందని ఎవ్వరూ అనుకోలేదు. వాళ్లిద్దరి దారులు భిన్నంగా ఉంటాయి. ఈ కాంబినేషన్లో సినిమా అని ముందుగా వార్తలొచ్చినపుడు చాలా మంది నమ్మలేదు. కానీ అదే నిజమైంది. పూరి-బాలయ్య సినిమా మొదలైంది. ఈ సినిమా షూటింగ్ చకచకా కానిచ్చేస్తున్నారు. కాంబినేషన్ క్రేజ్ దృష్ట్యా ఈ సినిమాపై ప్రేక్షకుల్లోనే కాదు.. ట్రేడ్ వర్గాల్లో కూడా మంచి ఆసక్తి కనిపిస్తోంది. ఈ చిత్ర శాటిలైట్ హక్కులు అప్పుడే ఫ్యాన్సీ రేటుకు అమ్ముడైపోయినట్లు సమాచారం. ప్రముఖ ఛానెల్ ‘జెమిని’.. పూరి-బాలయ్య సినిమా హక్కుల్ని రూ.9 కోట్లకు సొంతం చేసుకున్నట్లు సమాచారం. బాలయ్యకైనా.. పూరికైనా ఇది రికార్డు రేటే.

పూరి జగన్నాథ్ ఇప్పుడున్న ఫామ్ చూస్తే ఈ రేటు పలకడం అనూహ్యమే. ‘టెంపర్’ తర్వాత ఆయన తీసిన నాలుగు సినిమాలూ అట్టర్ ఫ్లాపులే. అందులోనూ పూరి చివరగా డైరెక్ట్ చేసిన ‘రోగ్’ డిజాస్టర్ అయింది. ఐతే ఆ ప్రభావం ఏమీ బాలయ్య సినిమాపై ఉండదనడానికి శాటిలైట్ హక్కులు ఈ రేటు పలకడమే నిదర్శనం. సినిమాకు బిజినెస్ ఆఫర్స్ కూడా బాగానే వస్తున్నట్లు సమాచారం. ఇప్పటికే దాదాపు 40 శాతం షూటింగ్ పూర్తి చేసేశాడట పూరి. ముందు చెప్పినట్లే సెప్టెంబరు 30న ఈ సినిమాను ప్రేక్షకుల ముందుకు తేవాలని పట్టుదలతో ఉన్నాడు పూరి. భవ్య క్రియేషన్స్ బేనర్ మీద ఆనంద్ ప్రసాద్ ఈ చిత్రాన్ని నిర్మిస్తున్నారు.

Like Us on Facebook : https://www.facebook.com/Tupakidotcom/