లోఫ‌ర్‌ ని లైవ్‌ లో చూపించిన పూరి!

ఇప్ప‌టిదాకా సినిమా షూటింగ్‌ ని ఎవ్వ‌రూ లైవ్‌ లో చూపించ‌లేదు. `బాహుబ‌లి` గుమ్మ‌డికాయ ఫంక్ష‌న్‌ ని మాత్ర‌మే ఆన్‌ లైన్‌ లో లైవ్‌ గా చూపించారు. పూరి జ‌గ‌న్నాథ్ తొలిసారి టెక్నాల‌జీని ఉప‌యోగించుకొని త‌న `లోఫ‌ర్‌` షూటింగ్‌ ని లైవ్‌ లో చూపించాడు. మెగా హీరో వ‌రుణ్‌ తేజ్‌, దిశా ప‌టాని జంట‌గా `లోఫ‌ర్‌` అనే చిత్రాన్ని తెర‌కెక్కిస్తున్నాడు పూరి. ప్ర‌స్తుతం గోవా బీచ్‌ లో వేసిన ఓ చిన్న సెట్‌ లో యాక్ష‌న్ స‌న్నివేశాల్ని తెర‌కెక్కిస్తున్నారు. వ‌రుణ్‌ తేజ్‌ తోపాటు విల‌న్ చ‌ర‌ణ్‌ దీప్‌, క‌మెడియ‌న్ అలీ ఇత‌ర ఆర్టిస్టులు కూడా షూటింగ్‌ లో పాల్గొంటున్నారు. గోవా క్లైమేట్‌ ని, ఆ లొకేష‌న్‌ ని ప్రేక్ష‌కుల‌కు లైవ్‌ లో చూపించాల‌నుకొన్నాడు పూరి. వెంట‌నే టెక్నాల‌జీని ఉప‌యోగించుకొని పెరిస్కోప్ ద్వారా చూపించాడు. అది చూసిన ప్రేక్ష‌కులు స‌రికొత్త అనుభూతికి లోన‌య్యారు. పూరి సినిమా షూటింగ్ అంటే య‌మా ఫాస్ట్‌గా సాగిపోతుంటుంది. లైవ్‌ లో కూడా విష‌యం స్ప‌ష్టంగా క‌నిపించింది. రెండే రెండు నిమిషాల్లో షాట్‌ కి రెడీ అయిపోయారు. భారీ సెట‌ప్‌ తో, భారీ క్రేన్ ల‌ను ఉప‌యోగిస్తూ షూటింగ్ చేస్తున్న‌ట్టు లొకేష‌న్‌ ని చూస్తే అర్థ‌మ‌వుతోంది.

పూరి గ‌త షెడ్యూల్‌ ని జోథ్‌ పూర్‌లో షూట్ చేశాడు. అక్క‌డి చారిత్రాత్మ‌క క‌ట్ట‌డాల్లో షూటింగ్ జ‌రిపాడు. అక్క‌డి లొకేష‌న్‌ ని కూడా త‌న‌దైన శైలిలో సెల్‌ ఫోన్‌ లో బంధించాడు. ఆ వీడియోని కూడా ట్విట్ట‌ర్‌ లో పెట్టాడు. ఇప్పుడు జ‌రుగుతున్న గోవా షెడ్యూల్‌ తో `లోఫ‌ర్‌` షూటింగ్ ఆల్మోస్ట్‌ గా పూర్త‌యిపోయిన‌ట్టేన‌ని చిత్ర వ‌ర్గాలు చెబుతున్నాయి. ముందు చెప్పిన‌ట్టుగానే అతి త‌క్కువ సమ‌యంలోనే సినిమాని పూర్తి చేయ‌బోతున్నాడు పూరి. వ‌రుణ్ న‌టించిన `కంచె` అక్టోబ‌రు 2న విడుల‌ద‌వుతుంది. ఆలోపుగానే `లోఫ‌ర్‌`ని సిద్ధం చేస్తాడు పూరి. మూడు నాలుగు వారాల గ్యాప్‌ తోనే `లోఫ‌ర్‌`ని ప్రేక్ష‌కుల ముందుకు తీసుకొస్తారు.