‘ఇజం’ ల్యాండ్ మార్క్ సినిమా అట

పూరి జగన్నాథ్-నందమూరి కళ్యాణ్ రామ్.. ఎవ్వరూ ఊహించని కాంబినేషన్ ఇది. వీళ్లిద్దరూ జట్టు కట్టినపుడే ఈ సినిమా మీద ఆసక్తి మొదలైంది. నిన్నటి ఫస్ట్ లుక్ పోస్టర్లు చూశాక ఆసక్తి రెట్టింపైంది. నిన్నట్నుంచి టాలీవుడ్లో ఎక్కడ చూసినా ఈ సినిమా గురించే చర్చ నడుస్తోందిప్పుడు. తన సినిమా గురించి ఇంత డిస్కషన్ జరుగుతుండటం పట్ల చాలా సంతోషం వ్యక్తం చేసిన పూరి జగన్నాథ్.. తనకు కళ్యాణ్ రామ్ కు ఈ సినిమా ల్యాండ్ మార్క్ ఫిల్మ్ అవుతుందని వ్యాఖ్యానించాడు. అందరూ అనుకుంటున్నట్లుగానే ఇందులో కళ్యాణ్ రామ్ జర్నలిస్టు పాత్ర పోషిస్తున్నట్లు పూరి వెల్లడించాడు.

హీరో క్యారెక్టరైజేషనే ఈ సినిమాకు ప్రధాన ఆకర్షణ అని.. కళ్యాణ్ రామ్ ఇంతకుముందెన్నడూ చూడని ఈ సినిమాలో కనిపిస్తాడని.. అతడి పాత్ర చాలా పవర్ ఫుల్ గా ఉంటుందని పూరి తెలిపాడు. ‘ఇజం’ను సెప్టెంబరు 29న దసరా కానుకగా విడుదల చేయబోతున్నట్లు కూడా పూరి కన్ఫమ్ చేశాడు. ఇంతకముందు ‘కెమెరామన్ గంగతో రాంబాబు’లోనూ హీరోనూ రిపోర్టర్ గా చూపించాడు పూరి. ఆ సినిమా సరైన ఫలితాన్నివ్వలేదు. ఇప్పుడు మళ్లీ రిపోర్టర్ ను హీరోను చేస్తుండటం ఆసక్తి రేకెత్తిస్తోంది. కళ్యాణ్ రామ్ స్వయంగా నిర్మిస్తున్న ఈ చిత్రానికి అనూప్ రూబెన్స్ సంగీతాన్నందిస్తున్నాడు. మాజీ మిస్ ఇండియా అదితి ఆర్య కళ్యాణ్ రామ్ సరసన కథానాయికగా నటిస్తోంది. జగపతి బాబు విలన్ పాత్ర చేస్తున్నాడు.