పీఎం మ‌న‌వ‌డు రోగ్ వేషాలు

పూరి-మ‌హేష్ కాంబినేష‌న్ అంటేనే సంథింగ్ ఉంటుంద‌ని ఊహిస్తారంతా. పోకిరి రికార్డులు - బిజినెస్‌ మేన్ వే ఆఫ్ స్ట‌యిల్ పూరీ లెవ‌ల్‌ ని మ‌రో మెట్టు ఎక్కించాయి. అందుకే మ‌రోసారి ఈ క‌ల‌యిక‌లో సినిమా సెట్స్ కెళుతోంది అంటే అంచ‌నాలు పీక్స్‌ లో ఉంటాయి. అప్ప‌ట్లో పూరి జ‌గ‌న్నాథ్ రోగ్ అనే టైటిల్‌ ని రిజిష్ట‌ర్ చేయించి ఆ క‌థ‌ని మ‌హేష్‌ కి వినిపించాడ‌ని, ఇక సెట్స్‌ కెళ్ల‌డ‌మే త‌రువాయి అని ప్ర‌చార‌మైంది.

అయితే ఏం జ‌రిగిందో? మ‌హేష్ ఆ ప్రాజెక్టును కాద‌నుకుని బ్ర‌హ్మోత్స‌వం చిత్రీక‌ర‌ణ‌లో బిజీ అయిపోయాడు. ఈలోగానే పూరి నాగ‌బాబు త‌న‌యుడు వ‌రుణ్‌ తేజ్‌ ని లోఫ‌ర్‌ గా చూపించే ప‌నిలో ప‌డ్డాడు. అయితే ఇప్పుడు పూరి క్యాంప్ నుంచి మ‌రో సెన్సేష‌న‌ల్ న్యూస్ బైటికి వ‌చ్చింది. పూరి మ‌రో డెబ్యూ హీరోని తెర‌కి ప‌రిచ‌యం చేయ‌బోతున్నాడు. క‌న్న‌డ ప‌రిశ్ర‌మ‌లో స‌ద‌రు హీరో ఇంట్ర‌డ్యూస్ అవుతున్నాడు. మాజీ ప్ర‌ధాన మంత్రి హెచ్‌.డి.దేవేగౌడ మ‌న‌వడు, క‌ర్నాట‌క మాజీ ముఖ్య‌మంత్రి హెచ్‌.డి.కుమార‌స్వామి త‌న‌యుడు నిఖిల్ గౌడను తెర‌కు ప‌రిచ‌యం చేస్తున్నాడు పూరి. ఈ సినిమా కోసం 60 కోట్ల భారీ బ‌డ్జెట్‌ ను ఖ‌ర్చు చేయ‌నున్నార‌ని స‌మాచారం.

పైగా దేవేగౌడకు ఫ్యామిలీకి సంబంధించిన సొంత బ్యాన‌ర్ లోనే ఈ సినిమాని నిర్మిస్తున్నార‌ని స‌మాచారం. ఇంత‌కుముందే క‌న్న‌డ హీరో పునీత్ రాజ్‌ కుమార్‌ ని అప్పుగా తెర‌కి ప‌రిచ‌యం చేశాడు. ఆ సినిమా క‌న్న‌డ‌లో బ్లాక్‌ బ‌స్ట‌ర్ హిట్‌. పునీత్ ఇప్పుడు స్టార్ హీరోగా వెలిగిపోతున్నాడు. ఇప్పుడు నిఖిల్ గౌడ్ కూడా ఆరేంజులోనే స్టార్ అవ్వ‌డం ఖాయ‌మ‌నే వినిపిస్తోంది.