బాలయ్య సినిమాకి పూరీ సెంటిమెంట్స్

పూరీ జగన్నాధ్- నందమూరి బాలకృష్ణ కాంబినేషన్ లో సినిమా ప్రారంభమైంది. ఈ కాంబో అనౌన్స్ చేసినప్పటి నుంచి అమితమైన ఆసక్తిని కలిగించిన ఈ ప్రాజెక్ట్.. మరికొన్ని రోజుల్లోనే రెగ్యులర్ షూటింగ్ ప్రారంభించుకోనుంది. అయితే.. షూటింగ్ విషయంలోను.. సినిమా విషయంలోను పూరీకి రెండు సెంటిమెంట్స్ ఉన్నాయి. వాటిని తన ప్రతీ సినిమాలో కచ్చితంగా పాటించేస్తూ ఉంటాడు ఈ మాస్ దర్శకుడు.

అల్యూమినియం ఫ్యాక్టరీలో ఫైట్ సీన్ తో షూటింగ్ ప్రారంభించడం అనే సెంటిమెంట్ ను.. పోకిరి టైమ్స్ నుంచి కంటిన్యూ చేస్తున్నాడు పూరీ. ఇప్పుడు బాలయ్య మూవీని కూడా కొండాపూర్ లోని అల్యూమినియం ఫ్యాక్టరీలోనే మొదలుపెట్టనున్నాడట. ఇక్కడ విలన్ గ్యాంగ్ తో బాలయ్య చేసే ఓ భీకరమైన ఫైట్ ను తొలుత చిత్రీకరించనుండగా.. ఇది బాలకృష్ణ ఇంట్రడక్షన్ ఫైట్ సీన్ అని తెలుస్తోంది. ఈ యాక్షన్ ఎపిసోడ్ పిక్చరైజేషన్ పూర్తి చేశాక.. ఏప్రిల్ నుంచి కొన్ని రొమాంటిక్ సన్నివేశాల షూటింగ్ కు జరపనున్నారని తెలుస్తోంది.

అయితే.. ఇంకా హీరోయిన్లను అనౌన్స్ చేయకపోవడంతో.. ఏప్రిల్ షెడ్యూల్ పై కొన్ని అనుమానాలున్నాయి. బాలయ్యకు జోడీగా.. ఇద్దరు కొత్త భామలను తీసుకురావాలన్నది పూరీ ఆలోచన కాగా.. కనీసం ఒకరైనా స్టార్ హీరోయిన్ ఉండాలని నిర్మాతలు పట్టుబడుతున్నారట. అలాగే తన ప్రతీ సినిమాలోను ఐటెం సాంగ్ ను ఉంచే పూరీ.. ఈ సెంటిమెంట్ కూడా కంటిన్యూ చేయనున్నాడు.


Like Us on Facebook : https://www.facebook.com/Tupakidotcom/