రోగ్ రివ్యూలకు థ్యాంక్స్ అంటున్న పూరి

పూరి జగన్నాథ్ దర్శకత్వంలో తెరకెక్కిన కొత్త సినిమా ‘రోగ్’కు అన్నీ పాజిటివ్ రివ్యూలే వచ్చాయట. అలాంటి రివ్యూలు రాసినందుకు చాలా థ్యాంక్స్ అంటున్నాడు పూరి. ‘రోగ్’ సక్సెస్ మీట్లో భాగంగా ఆయనీ వ్యాఖ్యలు చేశాడు. ఒక హీరో రెండు మూడు మంచి సినిమాలు చేస్తే ఎంత పేరు తెచ్చుకుంటాడో.. ‘రోగ్’తో అంత పేరు సంపాదించాడని కూడా అన్నాడు పూరి. తన సినిమాకు మంచి ఓపెనింగ్స్ వచ్చాయని.. ఇప్పటికీ 90 శాతం వసూళ్లతో సినిమా నడుస్తోందని పూరి చెప్పాడు. ‘రోగ్’ సక్సెస్ మీట్లో పూరి ఇంకా ఏమన్నాడంటే..

‘‘మా ‘రోగ్’ సినిమాకు మంచి ఓపెనింగ్స్ వచ్చాయి. ఇటు తెలుగులో.. అటు కన్నడలో చాలా మంచి రెస్పాన్స్‌ వస్తోంది. రివ్యూస్ అన్నీ చాలా పాజిటివ్‌ గా రాసి మా సినిమాని ఎంకరేజ్‌ చేస్తున్నందుకు అందరికీ నా థ్యాంక్స్. మా టీం అంతా కొన్ని ధియేటర్లకు వెళ్లి ప్రేక్షకుల మధ్య చూశాం. ప్రేక్షకుల రెస్పాన్స్‌ చూసి చాలా ఎంజాయ్‌ చేశాం. ఇషాన్‌ కు చాలా మంచి పేరు వచ్చింది. రెండు మూడు సినిమాలు చేసిన హీరోకి ఎంత పేరు వస్తుందో ఇషాన్‌ తొలి సినిమాకే అంత పేరు కొట్టేశాడు. ఇషాన్‌ చాలా బాగున్నాడని.. మంచి హీరోను పరిచయం చేశారని నాకు కొన్ని వందల మెసేజెస్ వస్తున్నాయి. మన్నారా.. ఏంజెలా కూడా బాగా చేశారు. మన్నారాకు ఫ్యాన్స్‌ ఎక్కువైపోయారు. టాలెంట్‌ ఉన్న కొత్త వాళ్లతో వర్క్‌ చేస్తుంటే నాకు చాలా కిక్కుగా ఉంటుంది. సినిమా అందరికీ నచ్చింది. ఈ రోజుకి కూడా ఆల్మోస్ట్ అన్ని థియేటర్లూ 90 శాతం ఫుల్స్‌ అయ్యాయి’’ అని పూరి అన్నాడు. ఐతే పూరి చెప్పిన ప్రకారం ఈ సినిమాకు ఎంతమంది పాజిటివ్ రివ్యూలిచ్చారు.. సినిమా ఎన్ని చోట్ల 90 శాతం ఫుల్స్ వస్తున్నాయి.. ఇషాంత్ కు అంత మంచి పేరు ఎక్కడొచ్చేసింది.. మన్నారాకు ఎంతమంది అభిమానులైపోయారు అన్నదే సందేహం.

Like Us on Facebook : https://www.facebook.com/Tupakidotcom/