పూరితో సెట్టయ్యిందా అఖిల్?

అక్కినేని వారసుడు అఖిల్ మొదటి అడుగులోనే తడబడినప్పటికీ రెండవ సినిమాతో పరిగెత్తే ప్రయత్నం చేసాడు. అతని ప్రయత్నంలో కష్టం కనిపించినప్పటికీ రెండవ సినిమా హలో కూడా బాక్స్ ఆఫీస్ పరంగా ఫెయిల్యూర్ గా నిలిచింది. అయితే ఆ సినిమా నటుడిగా అఖిల్ కు మంచి గుర్తింపుని తెచ్చిపెట్టింది. దీంతో తన పాజిటివ్ నెగిటివ్ విషయాలపై ఒక అవగాహనకు వచ్చిన అఖిల్ నెక్స్ట్ కథలపై ద్రుష్టి పెట్టాడు.

అయితే అఖిల్ నెక్స్ట్ ఏ దర్శకుడితో చేస్తాడు అనే విషయం ఇప్పుడు హాట్ టాపిక్ గా మారింది. గతంలో కొరటాల శివతో కథా చర్చలు జరిపినట్లు వార్తలు వచ్చిన సంగతి తెలిసిందే. అలాగే సుకుమార్ తో కూడా మనోడు టచ్ లో ఉండడంతో కొద్దిగా ఆ కాంబినేషన్ పై రూమర్స్ వచ్చాయి. ఇటీవల వర్మ శిష్యుడితో కూడా చేయాలనీ చర్చలు జరిగినట్లు వార్తలు వచ్చాయి. అయితే ఫైనల్ గా అఖిల్ వారితో కాకుండా పూరి జగన్నాథ్ తో చేయడానికి సిద్దమైనట్లు తెలుస్తోంది. ఇంకా అధికారికంగా ఏ విషయం తెలియలేదు.

కానీ రీసెంట్ గా పూరి అఖిల్ కు ఒక మంచి మాస్ కథను వినిపించాడని తెలుస్తోంది. నాగార్జున కూడా పూరి చెప్పిన కాన్సెప్ట్ కు పాజిటివ్ గా రెస్పాండ్ అయ్యాడట. ఇంతకుముందు వీరి కలయికలో శివమణి - సూపర్ సినిమాలు వచ్చిన సంగతి తెలిసిందే. కమర్షియల్ గానే కాకుండా ఆ సినిమాలు నాగార్జునకి మంచి గుర్తింపు తెచ్చిపెట్టాయి. అదే తరహాలో ఇప్పుడు అఖిల్ కి కూడా పూరి హిట్ ఇస్తాడని నమ్మకంతో నాగ్ పూరి స్క్రిప్ట్ ని ఫైనల్ చేశాడని తెలుస్తోంది. ప్రస్తుతం మెహబూబా షూటింగ్ తో బిజీగా ఉన్న పూరి ఆ సినిమా షూటింగ్ అయిపోగానే అధికారికంగా ప్రకటన ఇవ్వనున్నాడని సమాచారం.