ఆ విషయంలో 'ఆర్ఆర్ఆర్'ను బీట్ చేసిన పుష్ప!

టాలీవుడ్ స్టార్ హీరో అల్లు అర్జున్ కెరీర్ లోనే ఎంతో ప్రతిష్టాత్మకంగా తెరకెక్కుతున్న చిత్రం పుష్ప. స్టార్ డైరెక్టర్ సుకుమార్ - అల్లు అర్జున్ కాంబినేషన్ లో రాబోతున్న మూడో సినిమా ఇది. అయితే ఇప్పటివరకు ఆర్య, ఆర్యా-2 సినిమాలను తెలుగు వరకే పరిమితం చేసిన సుకుమార్ బృందం.. ఈసారి పుష్ప సినిమాను మాత్రం పాన్ ఇండియా సినిమాగా రూపొందిస్తున్నారు. అంటే ఈ సినిమాతో అల్లు అర్జున్ పాన్ ఇండియా హీరోగా మారబోతున్నాడని అర్ధమవుతుంది. పుష్ప మేకర్స్ ఇదివరకే సినిమాను పాన్ ఇండియా లెవెల్లో ఆగష్టు 13న విడుదల చేస్తామని ప్రకటించారు. అందుకు తగ్గట్టుగానే షూటింగ్ కూడా శరవేగంగా పూర్తి చేసుకుంటోంది ఈ సినిమా. అయితే పాన్ ఇండియా స్టార్ కాకముందే కేవలం పుష్ప ఇంట్రడక్షన్ వీడియోతో రికార్డులు బ్రేక్ చేస్తున్నాడు బన్నీ.

ఇదివరకు వచ్చిన పాన్ ఇండియా సినిమాలు బాహుబలి, ఆర్ఆర్ఆర్ సినిమాలతో పాటు సూపర్ స్టార్ రజినీకాంత్ రోబో 2.O సినిమాల టీజర్లను కూడా పుష్ప సినిమా ఇంట్రడక్షన్ వీడియో బీట్ చేసింది. రెండు రోజుల్లో అల్లు అర్జున్ పుష్ప వీడియో 34 మిలియన్స్ వ్యూస్ దక్కించుకొని ట్రెండింగ్ లో ఉంది. రాజమౌళి తెరకెక్కిస్తున్న ఆర్ఆర్ఆర్ టీజర్స్.. భీమ్ ఫర్ రామరాజు (1ఇయర్ లో 43మిలియన్స్), రామరాజు ఫర్ భీమ్(5నెలల్లో 48మిలియన్స్) వద్దే నిలిచిపోగా.. పుష్ప మాత్రం కేవలం రెండు రోజుల్లో అటు క్లాస్ ఇటు మాస్ ప్రేక్షకులను ఆకట్టుకొని 34మిలియన్స్ సొంతం చేసుకుంది. ఈ లెక్కన పుష్ప సినిమాపై ప్రేక్షకులకు ఏ రేంజిలో ఆసక్తి నెలకొందో అర్ధం చేసుకోవచ్చు. ఈ సినిమాను మైత్రి మూవీ మేకర్స్ వారు నిర్మిస్తుండగా.. రష్మిక మందన, ఫాహద్ ఫాజిల్ కీలకపాత్రల్లో నటిస్తున్నారు. దేవిశ్రీ ప్రసాద్ సంగీతం అందిస్తున్నాడు.