తారక్ - విజయ్ లపై పుష్పరాజ్ ఎఫెక్ట్..?

ఏదైనా ఒక సినిమాలోని కంటెంట్ జనాలకు బాగా రీచ్ అయినప్పుడు.. ఎక్కుగా అదే తరహా చిత్రాలు తెరకెక్కుతుండటం అనేది సహజం. ఎందుకంటే ప్రేక్షకుల అభిరుచికి తగ్గట్టుగా సినిమాలు చేయాలని ఫిలిం మేకర్స్ భావిస్తుంటారు. అలానే అలాంటి జోనర్స్ లో నటించడానికి హీరోలు సైతం ఆసక్తి కనబరుస్తుంటారు.

అయితే ఇప్పుడు ఇండస్ట్రీలో 'పుష్ప' సినిమా గురించి ఎక్కువ చర్చ జరుగుతోంది. అల్లు అర్జున్ - డైరెక్టర్ సుకుమార్ కాంబినేషన్ లో వచ్చిన ఈ సినిమా బాక్సాఫీస్ వద్ద భారీ వసూళ్లు రాబట్టింది. తెలుగుతో పాటుగా హిందీ తమిళ కన్నడ మలయాళ భాషల్లో అంచనాలకు మించి ఆడింది.

శేషాచలం అడవుల్లో ఎర్రచందనం స్మగ్లింగ్ నేపథ్యంలో 'పుష్ప' చిత్రాన్ని తెరకెక్కించారు. కూలీగా జీవితాన్ని ప్రారంభించిన ఓ యువకుడు.. స్మగ్లింగ్ సిండికేట్ ను శాసించే స్థాయికి ఎలా ఎదిగాడు? ఈ కక్రమంలో ఎలాంటి సవాళ్లను ఎదుర్కొన్నాడనేది ఈ సినిమాలో చూపించారు. ఇందులో బన్నీ పుష్పరాజ్ అనే మాస్ పాత్రలో జీవించాడనే చెప్పాలి.

డిఫరెంట్ హెయిర్ స్టైల్ - గుబురు గడ్డంతో రా అండ్ రస్టిక్ లుక్ లోకి మారిపోయాడు అల్లు అర్జున్. నటుడిగా తనలోని మరో కోణాన్ని ఆవిష్కరించిన బన్నీకి మంచి ప్రశంసలు దక్కాయి. ఇక ఈ సినిమాలో అతని మేనరిజమ్స్ ఇప్పుడు బయట అందరూ తగ్గేదే లే అంటూ ఫాలో అవుతున్నారు.

ఈ నేపథ్యంలో ఇప్పుడు స్టార్ హీరోలందరూ 'పుష్ప' తరహా రా అండ్ రస్టిక్ సినిమాలు చేయడానికి.. పుష్పరాజ్ లాంటి పాత్రల్లో కనిపించడానికి ఇంట్రెస్ట్ చూపిస్తున్నారని తెలుస్తోంది. టాలీవుడ్ లో చాలా మంది హీరోలపై పుష్ప ఎఫెక్ట్ పడిందని టాక్ వినిపిస్తోంది.

జూనియర్ ఎన్టీఆర్ త్వరలో 'ఉప్పెన' ఫేమ్ బుచ్చిబాబు దర్శకత్వంలో ఓ మూవీ చేయనున్నారు. అధికారికంగా ప్రకటించనప్పటికీ.. ఈ ప్రాజెక్ట్ మీద క్లారిటీ వచ్చేసింది. ఇది పాన్ ఇండియా స్థాయిలో రూపొందే స్పోర్ట్స్ బ్యాక్‌ డ్రాప్ సినిమా అని టాక్ నడుస్తొంది. అయితే క్రీడా నేపథ్యం అయినప్పటికీ.. ఇందులో హీరో క్యారెక్టర్ పుష్పరాజ్ మాదిరిగా ఉండబోతుందని ఊహాగానాలు వినిపిస్తున్నాయి. స్క్రిప్ట్ అద్భుతంగా వచ్చిందని బుచ్చిబాబు గురువు సుకుమార్ ఇటీవల వెల్లడించారు.

ఇకపోతే రౌడీ స్టార్ విజయ్ దేవరకొండ కూడా అలాంటి కంటెంట్ ఉన్న సినిమాల్లో నటించడానికి ఆసక్తి కనబరుస్తున్నారట. ప్రస్తుతం 'లైగర్' సినిమాలో నటిస్తున్న వీడీ.. తన వద్దకు కథ చెప్పడానికి వస్తున్న దర్శకులకు 'పుష్ప' వంటి డిఫెరెంట్ కంటెంట్ తీసుకురమ్మని సూచిస్తున్నారట. ఇలా ఇప్పుడు చాలామంది స్టార్ హీరోలపై 'పుష్ప' ప్రభావం పడిందని ఇండస్ట్రీలో మాట్లాడుకుంటున్నారు.