'పుష్ప' సెన్సార్ పూర్తి.. మాస్ ఫెస్టివల్ కు సర్వం సిద్ధం..!

ఐకాన్‌ స్టార్‌ అల్లు అర్జున్ - దర్శకుడు సుకుమార్‌ కాంబినేషన్‌ లో తెరకెక్కుతున్న తాజా చిత్రం ''పుష్ప''. రెండు భాగాలుగా రూపొందుతున్న ఈ సినిమాలోని ఫస్ట్ పార్ట్ ''పుష్ప- ది రైజ్‌'' డిసెంబర్‌ 17న రిలీజ్ కానుంది. ఈ నేపథ్యంలో ప్రమోషన్స్ జోరు పెంచిన మేకర్స్.. సినిమాపై బజ్ తీసుకొచ్చారు.

తాజాగా 'పుష్ప: ది రైజ్' సినిమాకు సంబంధించిన సెన్సార్ కార్యక్రమాలు కూడా కంప్లీట్ అయినట్లు చిత్ర బృందం తెలిపింది. అన్ని ఫార్మాలిటీస్ పూర్తి చేసి సెన్సార్ బోర్డ్ ఈ చిత్రానికి 'యూ/ఏ' (U/A) సర్టిఫికేట్ జారీ చేసింది. దీంతో ఈ నెల 17న థియేటర్లలో మాస్ ఫెస్టివల్ కు అంతా సిద్ధమైందని చెప్పవచ్చు.

ఇకపోతే 'పుష్ప' ప్రచార కార్యక్రమాల్లో భాగంగా ప్రీ రిలీజ్ వేడుకకు ఏర్పాట్లు జరుగుతున్నాయి. డిసెంబర్ 12న యూసఫ్ గూడ పోలీస్ గ్రౌండ్స్ ‏లో ఈవెంట్ ని గ్రాండ్ గా నిర్వహించనున్నారు. చిత్ర బృందంతో పాటుగా పలువురు సినీ ప్రముఖులు ఈ మాసివ్ పార్టీకి హాజరు కానున్నారు.

కాగా, ఎర్ర చందనం స్మగ్లింగ్ నేపథ్యంలో రూపొందుతున్న 'పుష్ప' చిత్రంలో స్మగ్లర్ పుష్పరాజ్ పాత్రలో అల్లు అర్జున్ నటిస్తున్నారు. రష్మిక మందన్న హీరోయిన్ గా కనిపించనున్న ఈ సినిమాలో ఫహాద్‌ ఫాజిల్‌ - ధనుంజయ్‌ - సునీల్‌ - అనసూయ - అజయ్ ఘోష్ ముఖ్య పాత్రలు పోషిస్తున్నారు.

ఇప్పటికే 'పుష్ప' సినిమా నుంచి విడుదలైన ప్రచార చిత్రాలు - 'దాక్కో దాక్కో మేక' 'శ్రీవల్లి' 'సామీ సామీ' 'ఏ బిడ్డా.. ఇది నా అడ్డా' సాంగ్స్ మంచి రెస్పాన్స్ తెచ్చుకున్నాయి. ఈరోజు 'ఊ అంటావా.. ఉహూ అంటావా' అనే స్పెషల్ సాంగ్ రిలీజ్ కాబోతుంది. ఈ పాటలో సమంత సందడి చేయనుంది.

రాక్ స్టార్ దేవిశ్రీప్రసాద్ ఈ చిత్రానికి సంగీతం సమకూర్చారు. మిరోస్లా కుబా బ్రోజెక్ సినిమాటోగ్రఫీ అందించారు. ముత్యంశెట్టి మీడియా సహకారంతో మైత్రీ మూవీ మేకర్స్ బ్యానర్ పై నవీన్ ఎర్నేని - వై రవిశంకర్ ఈ సినిమాని నిర్మిస్తున్నారు. తెలుగు తమిళ మలయాళ కన్నడ హిందీ భాషల్లో 'పుష్ప' మూవీ విడుదల కానుంది.