'పుష్ప' సినిమాలో భాగం కానున్న ఒకప్పటి లవర్ బాయ్..?

అల్లు అర్జున్ - డైరెక్టర్ సుకుమార్ కాంబినేషన్ లో తెరకెక్కుతున్న పాన్ ఇండియా మూవీ ''పుష్ప''. ఎర్ర చందనం స్మగ్లింగ్‌ నేపథ్యంలో రూపొందుతున్న ఈ చిత్రాన్ని రెండు భాగాలుగా విడుదల చేయనున్నారు. ఇందులో రష్మిక మందన్నా హీరోయిన్ గా నటిస్తుండగా.. మలయాళ స్టార్ ఫహాద్ ఫాజిల్ విలన్ గా నటిస్తున్నారు. ప్రకాష్ రాజ్ - జగపతిబాబు - సునీల్ - అనసూయ కీలక పాత్రలు పోషిస్తున్నారు. అయితే ఇప్పుడు ఈ చిత్రంలో ఒకప్పటి టాలీవుడ్ లవర్ బాయ్ తరుణ్ కూడా భాగం కాబోతున్నాడని ఫిలిం సర్కిల్స్ లో పుకార్లు షికారు చేస్తున్నాయి.

చైల్డ్ ఆర్టిస్ట్ గా కెరీర్ మొదలుపెట్టిన తరుణ్.. 'నువ్వే కావాలి' సినిమాతో హీరోగా పరిచయమయ్యాడు. పాతికేళ్ల వయసులోనే ఇండస్ట్రీ హిట్ అందుకున్న తరుణ్.. లవర్ బాయ్ ఇమేజ్ ని సొతం చేసుకున్నాడు. ఈ క్రమంలో 'నువ్వులేక నేను లేను' 'నువ్వే నువ్వే' 'ప్రియమైన నీకు' 'ఎలా చెప్పను' 'నీ మనసు నాకు తెలుసు' వంటి సినిమాలతో ప్రేక్షకులను మెప్పించాడు. అయితే కథల ఎంపికలో పొరపాట్లు చేయడంతో ఆ తర్వాత వరుస అపజయాలు అందుకున్నాడు. ఎన్ని ప్రయోగాలు చేసినా లాభం లేకపోవడంతో సినిమాలను పక్కన పెట్టి బిజినెస్ పై దృష్టి పెట్టాడు. ఈ నేపథ్యంలో రీసెంటుగా నటుడిగా కాకుండా తన తల్లి బాటలో డబ్బింగ్ ఆర్టిస్టుగా సరికొత్త అవతారమెత్తాడు తరుణ్.

ఫహాద్ ఫాజిల్ - సాయి పల్లవి జంటగా నటించిన 'అనుకోని అతిథి' సినిమా ఇటీవలే ఆహా ఓటీటీలో విడుదలైంది. ఇందులో ఫహాద్ కు తరుణ్ డబ్బింగ్ చెప్పడం విశేషం. మలయాళ నేచురల్ స్టార్ వాయిస్ కి సరిపోయేలా తరుణ్ డబ్బింగ్ చెప్పాడని అందరూ మెచ్చుకున్నారు. ఈ క్రమంలో ఇప్పుడు 'పుష్ప' లో విలన్ రోల్ లో నటిస్తున్న ఫహాద్ కు తరుణ్ చేతనే డబ్బింగ్ చెప్పించే అవకాశాలు ఉన్నాయని టాక్ వినిపిస్తోంది. 'అనుకోని అతిథి' సినిమాలో పాత్రకు సెట్ అయినట్లు తన వాయిస్ విలన్ పాత్రకు సూట్ అవుతుందో లేదో చూడాలి. తరుణ్ 'పుష్ప' సినిమాలో భాగం కానున్నట్లు వస్తున్న వార్తల్లో నిజమెంతో తెలియాలంటే ఇంకొన్ని రోజులు ఆగాల్సిందే.