'పుష్ప' చెప్పిన తేదీకి రావడం కష్టమేనా..?

సుకుమార్ దర్శకత్వంలో అల్లు అర్జున్ - రష్మిక మందన్నా హీరో హీరోయిన్లుగా తెరకెక్కుతున్న లేటెస్ట్ యాక్షన్ ఎంటర్టైనర్ ''పుష్ప''. ఇందులో మలయాళ నేచురల్ స్టార్ ఫహాద్ ఫాజిల్ విలన్ గా నటిస్తున్నాడు. ఎర్ర చందనం స్మగ్లింగ్‌ నేపథ్యంలో రానున్న ఈ చిత్రంలో బన్నీ లారీ డ్రైవర్‌ పుష్పరాజ్ పాత్రలో కనిపించనున్నాడు. రాక్ స్టార్ దేవిశ్రీ ప్రసాద్ సంగీతం సమకూరుస్తున్న ఈ చిత్రానికి.. మిరోస్లా కుబా బ్రోజెక్ సినిమాటోగ్రాఫర్ గా వ్యవహరిస్తున్నాడు. మైత్రీ మూవీ మేకర్స్ మరియు ముత్యంశెట్టి మీడియా సంస్థలు కలిసి ఈ సినిమాని నిర్మిస్తున్నాయి. తెలుగు, తమిళం, మలయాళం, కన్నడం, హిందీ భాషల్లో ఆగస్టు 13న విడుదల చేయనున్నట్లు మేకర్స్ ప్రకటించారు. అయితే ప్రస్తుత పరిస్థితులు చూస్తుంటే 'పుష్ప' చెప్పిన సమయానికి రావడం కష్టమే అని సినీ వర్గాల్లో టాక్ నడుస్తోంది.

'పుష్ప' నేపథ్యానికి తగట్టు ఎక్కువ భాగం షూటింగ్ దట్టమైన అడవుల్లో చేయాల్సి ఉంది. ఇప్పటికే తూర్పుగోదావరి జిల్లా మరేడుమిల్లి అభయారణ్యంలో రెండు షెడ్యూల్స్ షూటింగ్ పూర్తి చేశారు. ప్రస్తుతం తమిళనాడు రాష్ట్రంలోని టెన్ కాశీ ప్రాంతంలో ఈ సినిమా షూట్ జరుగుతోందని సమాచారం. అయితే రిలీజ్ డేట్ అనౌన్స్ చేయడం.. దానికి తగ్గట్టుగా చిత్రీకరణ చేయాల్సి రావడం చిత్ర యూనిట్ పై ఒత్తిడి పెడుతోందట. సాధారణంగా సుకుమార్ తన సినిమాలను నెమ్మదిగా హడావిడి లేకుండా కావల్సినంత టైం తీసుకొని పూర్తి చేస్తుంటారు. కానీ ఇప్పుడు 'పుష్ప' షూటింగ్ ఇంకా చాలా పెండింగ్ ఉంది. అందులోను రోజు రోజుకు కరోనా కేసులు పెరుగుతుండటం కూడా ఆందోళన కలిగిస్తోంది. ఈ నేపథ్యంలో 'పుష్ప' చెప్పిన డేట్ కి రావడం కుదరకపోవచ్చని అంటున్నారు. మరి రాబోయే రోజుల్లో ఎలాంటి పరిణామాలు జరుగుతాయో చూడాలి.