ఆసక్తి రేకేత్తిస్తున్న పుష్ప రిలీజ్ పోస్టర్.. బన్నీ ద్విపాత్రభినయమా??

టాలీవుడ్ స్టైలిష్ స్టార్ అల్లు అర్జున్ కథానాయకుడుగా స్టైలిష్ సినిమాల డైరెక్టర్ సుకుమార్ కాంబినేషన్ లో తెరకెక్కుతున్న యాక్షన్ థ్రిల్లర్ మూవీ పుష్ప. ప్రస్తుతం మారేడుమిల్లి అడవి ప్రాంతంలో పుష్ప షూటింగ్ శరవేగంగా జరుగుతుంది. తాజాగా పుష్ప విడుదల తేదీ కూడా ప్రకటించింది చిత్రబృందం. ఈ ఏడాది ఆగస్టు 13న పుష్ప సినిమా థియేట్రికల్ రిలీజ్ అవుతుందని అదిరిపోయే సర్ప్రైజ్ ఇచ్చారు సుకుమార్ టీమ్.

విడుదల తేదీతో పాటు కొత్త పోస్టర్ కూడా రిలీజ్ చేశారు. బన్నీ కాలుమీద కాలువేసి కూర్చొని చేతిలో గొడ్డలితో కనిపిస్తున్న లుక్ మాస్ అని చెప్పాలి. మొత్తానికి పోస్టర్ చూసి అల్లు అర్జున్ అభిమానులు పండగ చేసుకుంటున్నారు. ఇప్పుడు ఈ పోస్టర్ అభిమానులతో పాటు సినీవర్గాలలో కొన్ని చర్చలకు దారితీస్తోంది. పోస్టర్ ఆధారంగా ఎన్నో సందేహాలు వ్యక్తం అవుతున్నాయంటూ కథనాలు వైరల్ అవుతున్నాయి.

అయితే పుష్ప మూవీ ఫస్ట్ లుక్ పోస్టర్ విడుదల చేసినప్పుడు అల్లు అర్జున్ కాలుకు ఆరు వేళ్లు ఉన్నట్లు చూపించారు. కొత్తగా రిలీజ్ డేట్ ప్రకటించిన పోస్టర్‌లో కాలుకు ఐదు వేళ్లు మాత్రమే ఉన్నట్లు కనిపిస్తుంది. ఈ తేడా గమనిస్తే అల్లు అర్జున్ ఈ సినిమాలో డ్యూయెల్ రోల్ పోషిస్తున్నాడని వార్తలు వెలువడుతున్నాయి. అయితే అందులో ఒక పాత్రలో గంధపు చెక్కల స్మగ్లర్‌గా, మరొక పాత్రలో వ్యాపారవేత్తగా బన్నీ కనిపించబోతున్నాడని పుకార్లు వైరల్ అవుతున్నాయి.

ఇన్ని సందేహాల మధ్య మరి అసలు విషయం తెలియాలంటే మేకర్స్ స్పందించే వరకు వెయిట్ చేయాల్సిందే. ఇక ఈ మూవీలో కథానాయిక పాత్రలో రష్మిక మందన నటిస్తుంది. పాన్ ఇండియా మూవీగా పుష్ప.. తెలుగు, తమిళం, కన్నడ, మలయాళం, మరియు హిందీ భాషలలో విడుదల కాబోతుంది.