లొకేషన్స్ వేటలో పడిన 'పుష్ప' టీమ్...!

స్టైలిష్ డైరెక్టర్ సుకుమార్ - అల్లు అర్జున్ కాంబినేషన్ లో తెరకెక్కుతున్న మూవీ 'పుష్ప'. బన్నీ - సుక్కు కాంబినేషన్ లో రాబోతున్న హ్యాట్రిక్ సినిమా కావడంతో అందరి కళ్ళు ఇప్పుడు ఈ సినిమాపైనే ఉన్నాయి. అంతేకాకుండా 'రంగస్థలం' వంటి బ్లాక్ బస్టర్ తర్వాత సుకుమార్ రూపొందిస్తున్న సినిమా కావడం.. 'అల వైకుంఠపురంలో' సినిమా తర్వాత బన్నీ నటిస్తున్న సినిమా కావడంతో ఈ సినిమాపై భారీ అంచనాలు ఉన్నాయి. ఇప్పటికే ఒక షెడ్యూల్ కంప్లీట్ చేసుకున్న ఈ సినిమా తదుపరి షెడ్యూల్ కోసం కేరళ వెళ్లాలని ప్లాన్ చేసారు. కానీ మహమ్మారి సూక్ష్మజీవి వచ్చి అన్నిటిని తారుమారు చేసింది. దీనికి తోడు ఇప్పట్లో బయట రాష్ట్రాలకు వెళ్లే పరిస్థితి కూడా కనిపించడం లేదు. అందువల్ల కేరళ షెడ్యూల్ పూర్తిగా రద్దు చేసుకున్నారట. ఈ సినిమా శేషాచలం అడవుల్లో ఎర్ర చందనం స్మగ్లింగ్ నేపథ్యంలో జరిగే స్టోరీ కావడంతో దట్టమైన అడవుల్లో షూటింగ్ చేయాలని చిత్ర యూనిట్ భావించారు. దీని కోసమే కేరళ రాష్ట్రాన్ని ఎంచుకున్నారు.

ఇప్పుడు మన నేటివిటీకి దగ్గరగా సహజత్వం ఉట్టిపడేలా పాత్రలు పండాలంటే లోకల్‌‌ గానే షూటింగ్ చేయాలని చిత్ర యూనిట్ డిసైడ్ అయ్యిందంట. అందుకే మన తెలుగు రాష్ట్రాల్లోనే దట్టమైన అడవులతో ఉండే ప్రదేశాలను.. షూటింగ్ కి అనుకూలంగా ఉండే ప్రదేశాలను చిత్ర బృందం వెతకడం స్టార్ట్ చేసిందట. దానికోసం గోదావరి పరిసర ప్రాంతాలను.. చిత్తూరు అడవులను పరిశీలిస్తున్నారట. అంతేకాకుండా ఇక్కడి సినీ శ్రామికులకు ఉపాధి కల్పించేందుకు వంద శాతం ఇండియాలోనే షూట్ చేయబోతోన్నారని.. మన లొకేషన్స్ లో తెరకెక్కబోతున్న లోకల్ సినిమా అని న్యూస్ వచ్చింది. ఈ సినిమాని మైత్రీ మూవీ మేకర్స్ వారు ఎంతో ప్రతిష్టాత్మకంగా తీసుకొని భారీ ఖర్చుతో నిర్మిస్తున్నారు.

'పుష్ప' సినిమాని తెలుగుతో పాటు త‌మిళ‌, మ‌ల‌యాళ‌, క‌న్న‌డ‌, హిందీ భాష‌ల్లో రిలీజ్ చేయ‌బోతున్నారు. పక్కా మాస్ అండ్ కమర్షియల్ ఎంటర్టైనర్ గా తెరకెక్కుతున్న ఈ సినిమాలో బన్నీ లారీ డ్రైవర్ గా కనిపించనున్నాడు. ఇప్పటికే రిలీజైన ఈ చిత్ర ఫస్ట్ లుక్ అంచనాలను పెంచేసింది. రాయలసీమ చిత్తూరు యాస, భాషతో పాటు బన్నీ ఊర మాసు.. మొరటు కుర్రాడిగా అదరగొడతాడనిపిస్తోంది. పాన్ ఇండియా మూవీ కావడంతో పలువురు ఇతర ఇండస్ట్రీల నటీనటులు కూడా 'పుష్ప'లో నటిస్తున్నారని సమాచారం. దేవిశ్రీ ప్రసాద్ సంగీతం అందిస్తున్న ఈ సినిమాలో రష్మిక మందన్న హీరోయిన్ గా నటిస్తోంది.