ఓవర్సీస్ లోనూ పర్వాలేదనిపించిన 'పుష్పక విమానం'

విజయ్ దేవరకొండ తమ్ముడు ఆనంద్ దేవరకొండ హీరోగా నటించిన కొత్త సినిమా "పుష్పక విమానం" గత శుక్రవారం ప్రేక్షకుల ముందుకు వచ్చింది. తొలి రోజు యావరేజ్ టాక్ తెచ్చుకున్న ఈ మూవీ వసూళ్ళ పరంగా పర్వాలేదనిపిస్తోంది. ఓవర్ సీస్ లోనూ ఈ సినిమా ఓ మోస్తరుగా కలెక్షన్స్ రాబడుతోంది.

యూఎస్ లో శనివారం వరకే ఈ సినిమా 70 వేల అమెరికన్ డాలర్స్ దాకా కలెక్షన్స్ రాబట్టింది. ఇక ఆస్ట్రేలియాలో 16,512 డాలర్లు కలెక్ట్ చేసినట్లు ట్రేడ్ వర్గాలు వెల్లడించాయి. తెలుగు రాష్ట్రాల్లోనూ ఈ సినిమా ఆశించిన స్థాయిలో వసూళ్ళు సాధిస్తోందని చిత్ర వర్గాలు చెబుతున్నాయి.

డైరెక్ట్ ఓటీటీ విధానంలో విడుదలైన 'మిడిల్ క్లాస్ మెలోడీస్' సినిమాతో మంచి సక్సెస్ అందుకున్న ఆనంద్ దేవరకొండ.. ఇప్పుడు "పుష్పక విమానం'' చిత్రంతో కమర్షియల్ హిట్ అందుకుంటారో లేదో అనేది మరికొన్ని రోజుల్లో తెలిపోతుంది.

కాగా, 'పుష్పక విమానం' చిత్రంలో ఆనంద్ దేవరకొండ సరసన గీత్ సైని - శాన్వి మేఘన హీరోయిన్లుగా నటించారు. సునీల్ - నరేష్ - హర్షవర్థన్ - అజయ్ - సుదర్శన్ ఇతర పాత్రలు పోషించారు. విజయ్ దేవరకొండ సమర్పణలో కొత్త దర్శకుడు దామోదర ఈ చిత్రాన్ని తెరకెక్కించారు.

కింగ్ అఫ్ ది హిల్ ప్రొడక్షన్ మరియు టాంగా ప్రొడక్షన్స్ బ్యానర్స్ పై గోవర్ధన్ రావు దేవరకొండ - విజయ్ మట్టపల్లి - ప్రదీప్ ఎర్రబెల్లి సంయుక్తంగా ఈ చిత్రాన్ని నిర్మించారు. రామ్ మిరియాల - సిద్దార్థ్ సదాశివుని - అమిత్ దాసాని ఈ చిత్రానికి సంగీతం సమకూర్చారు. హెస్టిన్ జోస్ జోసెఫ్ సినిమాటోగ్రఫీ అందించారు.