గోల్డెన్ వీసా అందుకుని డైరెక్టుగా వైజాగ్ కి పుష్ప‌రాజ్

ఐకాన్ స్టార్ అల్లు అర్జున్ దుబాయ్ లో అరుదైన గౌర‌వాన్ని అందుకున్నారు. ఆకాశ‌హార్మ్యాల‌ దుబాయ్ ప్ర‌భుత్వం అల్లు అర్జున్ కి గోల్డెన్ వీసాని మంజూరు చేయ‌డం అరుదైన గౌర‌వం. ఒక క‌థానాయ‌కుడిగా షేక్ ల న‌గ‌రంలో అత‌డికి ఇది ప్ర‌త్యేక గుర్తింపు. భార‌తీయ న‌టుల్లో అరుదుగా కొంద‌రికి మాత్ర‌మే ఇలాంటి గౌర‌వం గుర్తింపు ద‌క్కాయి.

ఈ తీపి క‌బురు చెప్పిన బ‌న్ని ఇంత‌లోనే పుష్ప‌రాజ్ గా ప‌రకాయ ప్ర‌వేశం చేసేందుకు రెడీ అవుతున్న‌ట్టు స‌మాచారం. అల్లు అర్జున్- సుకుమార్ ల మోస్ట్ అవైటెడ్ 2023 చిత‌రం 'పుష్ప-2' గ‌త డిసెంబర్ లో సెట్స్ పైకి వెళ్లింది. హైదరాబాద్‌ రామోజీ ఫిల్మ్‌సిటీలో ప్రత్యేకంగా వేసిన సెట్ లో మొదటి షెడ్యూల్ ను పూర్తి చేసారు.

ఇప్పుడు దుబాయ్ గోల్డెన్ వీసా అందుకున్న కిక్కులో ఉన్న బ‌న్ని త‌దుప‌రి 'పుష్ప-2' కొత్త షెడ్యూల్ లో పాల్గొనేందుకు బీచ్ సొగ‌సుల విశాఖ న‌గ‌రానికి వెళుతున్నారు. శుక్రవారం నుండి వైజాగ్ స‌హా ఆ చుట్టుపక్కల ప్రాంతాలలో చిత్రీక‌ర‌ణ‌ ప్రారంభం కానుంది. ఈ శుక్ర‌వారం సాయంత్రం అల్లు అర్జున్ తన టీమ్ తో కలిసి వైజాగ్ లో అడుగుపెడ‌తారని తెలిసింది.

దర్శకుడు సుకుమార్ మొదటి భాగం కంటే రెండో భాగాన్ని మరింత భారీ కాన్వాసుతో అసాధార‌ణ బ‌డ్జెట్ తో తెర‌కెక్కించాలనే ఆసక్తితో ఉన్నాడు. ఈ చిత్రంలో రష్మిక మందన్న కథానాయిక. పుష్ప-2లో మలయాళ నటుడు ఫహద్ ఫాసిల్ కీల‌క పాత్ర‌ను పోషిస్తున్నారు. పార్ట్ 2 లో పుష్ప‌రాజ్ వ‌ర్సెస్ ఫారెస్ట్ ఆఫీస‌ర్ ఎపిసోడ్స్ మ‌రో లెవ‌ల్లో ఉంటాయ‌ని అడ‌వుల్లో ఇంటెలెక్చువ‌ల్ గేమ్ ఎర్ర‌చంద‌నం స్మ‌గ్లింగ్ ను ప‌రాకాష్ట‌లో చూపించ‌బోతున్నార‌ని గుస‌గుస‌లు వినిపిస్తున్నాయి.

మైత్రీ మూవీ మేకర్స్ బ్యానర్ తో కలిసి సుకుమార్ రైటింగ్స్ ఈ చిత్రాన్ని నిర్మిస్తోంది. దేవి శ్రీ ప్రసాద్ సంగీతం అందిస్తున్నారు. టీమ్ గుస‌గుస‌ల ప్ర‌కారం.. పుష్ప-2 (పుష్ప-ది రూల్) 2024లో పాన్-ఇండియా కేట‌గిరీలో థియేట్రికల్ విడుదలకు వ‌చ్చే అవ‌కాశం ఉంద‌ని టాక్ వినిపిస్తోంది.

నోట్ : మీ ఫీడ్ బ్యాక్ మాకు ముఖ్యం. క్రింద కామెంట్ బాక్స్ లో కామెంట్ చేయండి. మా కంటెంట్ నచ్చినా చెప్పండి. నచ్చకపోయినా చెప్పండి. హుందాగా స్పందించండి. abuse వద్దు.