ఫ్యామిలీ ఆడియన్స్ తో పుష్పక విమానం' టీమ్ స్పెషల్ ఇంటరాక్షన్..!

ఆనంద్ దేవరకొండ హీరోగా నటించిన లేటెస్ట్ మూవీ ''పుష్పక విమానం''. ఇటీవల విడుదలైన ఈ సినిమా హిలేరియస్ ఫ్యామిలీ ఎంటర్ టైనర్ గా బాక్సాఫీస్ వద్ద మంచి విజయాన్ని అందుకుంది. ఈ నేపథ్యంలో చిత్ర బృందం ఆడియెన్స్ తో స్పెషల్ గా ఇంటరాక్ట్ అయ్యింది. హీరో ఆనంద్ దేవరకొండ - హీరోయిన్లు గీత్ సైని మరియు శాన్వి మేఘన - దర్శకుడు దామోదర - ఎగ్జిక్యూటివ్ ప్రొడ్యూసర్ అనురాగ్ పర్వతనేని - నటుడు కిరీటి ప్రేక్షకులతో సరదాగా సినిమా గురించి ముచ్చటించారు.

ఈ సందర్భంగా 'పుష్పక విమానం' సినిమా తమకు ఎంతగా నచ్చిందో ఆడియెన్స్ టీమ్ సభ్యులకు తెలియజేసారు. ఎక్కడా ఇబ్బంది పడకుండా ఫ్యామిలీతో కలిసి పుష్పక విమానం సినిమా చూసి ఎంజాయ్ చేశామని ఇంటరాక్షన్ లో పాల్గొన్న ప్రేక్షకులు చెప్పారు. లాక్ డౌన్ తర్వాత ఆడియెన్స్ కు ఒక మంచి నవ్వించే సినిమా అందించాలనే పుష్పక విమానం సినిమా చేసినట్లు ఆనంద్ దేవరకొండ అన్నారు. తాము అనుకున్న పర్పస్ నెరవేరిందని.. సినిమా హిట్ చేసినందుకు ప్రేక్షకులకు కృతజ్ఞతలు తెలిపారు. ఈ చిత్రానికి వస్తున్న రెస్పాన్స్ గురించి చిత్ర యూనిట్ అక్కడి ప్రేక్షకులతో పంచుకున్నారు. 'పుష్పక విమానం' సినిమా థియేటర్ లలో ఆడియెన్స్ ఎంతగా నవ్వుకున్నారో ఈ కార్యక్రమంలో ఓ వీడియో ద్వారా ప్రదర్శించారు.

కాగా, 'పుష్పక విమానం' చిత్రాన్ని విజయ్ దేవరకొండ సమర్పణలో కింగ్ అఫ్ ది హిల్ ప్రొడక్షన్ మరియు టాంగా ప్రొడక్షన్స్ బ్యానర్స్ పై రూపొందించారు. గోవర్ధన్ రావు దేవరకొండ - విజయ్ మట్టపల్లి - ప్రదీప్ ఎర్రబెల్లి నిర్మాతలుగా వ్యవహరించారు. రామ్ మిరియాల - సిద్దార్థ్ సదాశివుని - అమిత్ దాసాని ఈ చిత్రానికి సంగీతం సమకూర్చారు. హెస్టిన్ జోస్ జోసెఫ్ సినిమాటోగ్రఫీ అందించారు. ఇందులో సునీల్ - నరేష్ - హర్షవర్థన్ - అజయ్ - సుదర్శన్ ఇతర పాత్రలు పోషించారు.