ఫోటో స్టొరీ: బెస్ట్ రోల్ మోడల్

మన భారతదేశంలో అన్నిటికంటే ఎక్కువగా ఫోకస్ ఉండేది క్రికెట్ ఆటపైనే. కొన్నేళ్ళ క్రితం వరకూ క్రికెట్ తప్ప మరో ఆట లేదు అన్నట్టుగా ఉండేది. కానీ నెమ్మదిగా ఆ పరిస్థితి మారుతోంది. వివిధ రకాల క్రీడల్లో ఎంతో మంది ప్రతిభావంతమైన క్రీడాకారులు తమ సత్తా చాటుతున్నారు ప్రపంచస్థాయి టోర్నమెంట్లలో రాణిస్తూ మువ్వన్నెల జెండాను సగర్వంగా ఎగిరేలా చేస్తున్నారు. ఇలా భారతీయులందరినీ గర్వించేలా చేస్తూ.. భవిష్యత్తులో సత్తా చాటబోయే క్రీడాకారులకు ప్రేరణనిస్తున్నవారిలో బ్యాడ్మింటన్ ప్లేయర్ పీవీ సింధు ఒకరు.

భారతదేశం తరఫున 2016 లో ఒలింపిక్స్ లో రజత పతకం సాధించిన సింధు ఒక్కసారిగా భారీ పాపులారిటీ సంపాదించింది. ఒలింపిక్స్ మాత్రమే కాకుండా ఎన్నో ఇతర ప్రపంచ స్థాయి టోర్నీలలో పతకాలు సాధించి భారత పతాకం ఎగిరేలా చేసింది. రీసెంట్ గా బేసెల్ లో జరిగిన వరల్డ్ బ్యాడ్మింటన్ ఛాంపియన్ షిప్ టోర్నీలో ఉమెన్స్ సింగిల్స్ లో బంగారు పతకం సాధించి మరోసారి అందరి దృష్టిని ఆకర్షించింది. ప్రధాని నరేంద్ర మోది దగ్గర నుంచి మొదలు పెడితే సాధారణ భారతీయ పౌరుడివరకూ పీవీ సింధు సాధించిన ఘనతను చూసి ఉప్పొంగిపోయారు.

ఇక సింధు ఆటల విషయంలోనే కాదు స్టైల్ విషయంలో కూడా ఎవరికీ తీసిపోదు. అందుకే ఎన్నో కార్పోరేట్ బ్రాండ్స్ కూడా ఆమెను బ్రాండ్ అంబాజిడర్ గా నియమించుకుంటున్నాయి. కార్పోరేట్ కంపెనీలకు ఆమెకంటే బెస్ట్ బ్రాండ్ అంబాజిడర్.. యువతకు ఆమెకంటే బెస్ట్ రోల్ మోడల్ ఎవరుంటారు చెప్పండి? అందుకే సింధు పోస్టర్లు ఇప్పుడు సోషల్ మీడియాలో ట్రెండింగ్ గా మారాయి. ఈ ఫోటోలలో స్టైల్ తో పాటు.. స్మైల్ కూడా అదిరిపోయింది కదా. ఇప్పుడు న్యూ జెనరేషన్ పిల్లలకు పీవీ సింధు ఒక పోస్టర్ గర్ల్ అనడంలో ఏమాత్రం సందేహం లేదు.