మహేష్ ను కొంటే అనుష్క ఫ్రీ

మహేష్ కు అనుష్కకు సంబంధమేంటి? వీళ్లిద్దరూ కలిసి ఈ మధ్య ఏ సినిమా చేయలేదే అనుకుంటున్నారా? ఇక్కడే ఉంది మతలబు. ప్రస్తుతం మహేష్ బాబు హీరోగా ‘బ్రహ్మెత్సవం’ చిత్రాన్ని తెరకెక్కిస్తున్న పీవీపీ సినిమా సంస్థ ఇంతకుముందు అనుష్క ప్రధాన పాత్రలో రెండు ప్రెస్టీజియస్ మూవీస్ తీసిన సంగతి తెలిసిందే. మూడేళ్ల కిందట ‘వర్ణ’ తీసి దారుణంగా నష్టపోయిన ఆ సంస్థ.. ఇటీవలే ‘సైజ్ జీరో’ సినిమాతో మరోసారి చేతులు కాల్చుకుంది. ఈ రెండు సినిమాలకూ విడుదలకు ముందు మంచి క్రేజే ఉంది. కానీ రిలీజ్ తర్వాత మరింత క్రేజ్ వస్తుందన్న ఉద్దేశంతో శాటిలైట్ రైట్స్ అమ్మకుండా అట్టిపెట్టుకున్నారు. అది పెద్ద తప్పని తర్వాత తెలిసొచ్చింది.

వర్ణ సినిమా శాటిలైట్ రైట్స్ ఇప్పటిదాక ఎవరూ కొనలేదు. సైజ్ జీరో సినిమాకు కూడా డిమాండ్ లేదు. కానీ పీవీపీ వాళ్ల కొత్త సినిమా ‘బ్రహ్మోత్సవం’ విషయంలో మాత్రం ఛానెళ్లు పోటీ పడుతున్నాయి. ఐతే ఈ క్రేజ్ ను వాడుకుని.. అమ్ముడుబోని అనుష్క సినిమాలు రెంటినీ వదిలించేసుకుందామనుకుంటున్నాడు పొట్లూరి వరప్రసాద్. ‘బ్రహ్మోత్సవం’ సినిమాకు ఛానెళ్లు అడుగుతున్న రేటు కంటే ఎక్కువ చెబుతూ.. ఆ రేటు ఇస్తే వర్ణ - సైజ్ జీరో సినిమాల్ని కూడా ఇచ్చేస్తానని బేరం పెడుతున్నాడట ప్రసాద్. ఐతే అలా కూడా అనుష్క సినిమాల్ని కొనడానికి జనాలు అంతగా ఆసక్తి చూపట్లేదట. తమకు ‘బ్రహ్మోత్సవం’ మాత్రమే చాలని.. దాని వరకు ఫ్యాన్సీ ప్రైస్ ఇస్తామని అంటున్నారట. మరి ఈ బేరాన్ని ప్రసాద్ ఎలా తెగ్గొడతారో చూడాలి.