ఊపిరి పెద్ద ఫ్లాప్.. తేల్చేసిన ప్రొడ్యూసర్

2016లో విడుదలైన సినిమాల్లో.. అందులోను మంచి సినిమాల్లో ఊపిరిని కూడా ఖచ్చితంగా చెప్పుకోవాలి. చేతులు కాళ్లు కూడా కదపలేని వ్యక్తిగా నాగార్జున పెర్ఫామెన్స్.. కార్తి చేసిన అల్లరి అండ్ యాక్టింగ్.. తమన్నా అందాలు అన్నీ కలిపి ఈ మూవీని పెద్ద సక్సెస్ చేశాయని అన్నారు. విమర్శకులు కూడా మెచ్చుకున్న ఊపిరిని సూపర్ డూపర్ హిట్ అని మేకర్స్ కూడా అప్పట్లో చెప్పుకున్నారు.

కానీ ఇప్పుడు నిర్మాత ప్రసాద్ వి పొట్లూరి.. ఫిలిం ఛాంబర్ లో దర్శకుడు వంశీ పైడిపల్లిపై చేసిన ఫిర్యాదుతో ఊపిరి సక్సెస్ అంతా ఉత్తిమాటలే అని తేలిపోయింది. ఊపిరి చిత్రాన్ని 40 కోట్లతో తీస్తానని చెప్పిన దర్శకుడు.. కంప్లీట్ అయ్యేసరికి బడ్జెట్ ను 65 కోట్లకు చేర్చాడట. దీంతో ఈ మూవీపై తనకు 21 కోట్లు నష్టం వచ్చిందని.. ఈ నష్టాన్ని భర్తీ చేసేందుకు తర్వాతి సినిమాను తన బ్యానర్ పైనే చేస్తానని వంశీ పైడిపల్లి ఒప్పందం చేసుకున్నాడనేది కంప్లెయింట్.

అంతే కాదు ఆరు నెలల పాటు తన ఆఫీస్ లో తన ఎక్స్ పెండిచర్ తో స్టోరీ సిద్ధం చేసి ఇప్పుడు మహేష్ తో మూవీని ఇతర నిర్మాతలతో చేయడాన్ని అబ్జెక్ట్ చేస్తున్న పీవీపీ.. ఆ స్టోరీపై రైట్స్ కూడా అడుగుతున్నట్లు తెలుస్తోంది. అయితే.. 2016 బ్లాక్ బస్టర్లలో ఒకటిగా చెప్పుకున్న ఊపిరి మూవీ.. డిజాస్టర్ అనే సంగతి ఇప్పుడీ దర్శక నిర్మాతల మధ్య విబేధాల కారణంగా బయటకు వచ్చింది. సినిమా ఇండస్ట్రీలో అసలు సంగతులు ఇలాంటప్పుడే బయటపడుతుంటాయ్. అందులో ఇదీ ఒకటి.

Like Us on Facebook : https://www.facebook.com/Tupakidotcom/