ఫిలిం ఫైనాన్స్ లో దిగుతున్న పీవీపీ

పీవీపీ సినిమా.. ఇప్పుడు టాలీవుడ్ లో మహా క్రేజీ బ్యానర్ అయిపోయింది. తనకు ఎన్నో వ్యాపారాలు ఉన్నా సినిమాపై ఉన్న నమ్మకం, ప్రేమతో ఈ రంగంలోకి దిగారు పొట్లూరి వర ప్రసాద్. ఈయన పేరుపై ఏర్పడ్డ సినిమా నిర్మాణ సంస్థే పీవీపీ సినిమా. మొదట్లో వరుసగా పరాజయాలు ఎదురైనా.. ఈ ఏడాది నుంచి సక్సెస్ బాట పట్టిన పీవీపీ.. మే 20న విడుదల కానున్న మహేష్ బాబు మూవీ బ్రహ్మోత్సవానికి కూడా నిర్మించింది.

ఈయనకు ఇతర వ్యాపారాలు కూడా చాలానే ఉన్నా.. సినిమా రంగంలో మరింతగా విస్తరించేందుకు సిద్ధమవుతున్నారని తెలుస్తోంది. పీవీపీ సినిమా సంస్థ ద్వారా ఇక నుంచి సినిమాలకు ఫైనాన్స్ చేయాలని భావిస్తున్నారట. ఇలా చేయడం ద్వారా ఎక్కువ సినిమాల్లో భాగం కావచ్చన్నది కంపెనీ ఆలోచనగా తెలుస్తోంది. ఇదే సమయంలో సినీ నిర్మాణాలను తగ్గించుకోవాలనే ఆలోచన కూడా చేస్తున్నట్లు తెలుస్తోంది.

అద్భుతమైన కాంబినేషన్స్ సెట్ అయినపుడు, ప్రతిష్టాత్మకంగా ఆా చిత్రాలను తీయాలని పీవీపీ భావిస్తున్నారని అంటున్నారు. ముఖ్యంగా క్షణం లాంటి లో బడ్జెట్ చిత్రం సాధించిన విజయం చూశాక.. పీవీపీ ఆలోచనల్లో బాగా మార్పులు వచ్చాయని చెప్పచ్చు. ఊపిరితో రెండో సక్సెస్ రుచి చూసిన ఈ సంస్థ.. ఇప్పుడు బ్రహ్మోత్సవంతో హ్యాట్రిక్ కొట్టాలని భావిస్తోంది.