'రారా రెడ్డి' ప్రోమో: ఊర మాస్ స్టెప్పులతో అదరగొట్టిన నితిన్ - అంజలి..!

యూత్ స్టార్ నితిన్ హీరోగా నటిస్తున్న లేటెస్ట్ మాస్ అండ్ యాక్షన్ ఎంటర్టైనర్ ''మాచర్ల నియోజకవర్గం''. ఈ సినిమాతో ప్రముఖ ఎడిటర్ ఎమ్.ఎస్. రాజశేఖర్ రెడ్డి డైరెక్టర్ గా పరిచయం అవుతున్నారు. ఇందులో కృతి శెట్టి - కేథరిన్ త్రెసా హీరోయిన్లుగా నటిస్తున్నారు. పోస్ట్ ప్రొడక్షన్ దశలో ఉన్న ఈ మూవీకి సంబంధించిన ప్రమోషన్స్ జోరుగా సాగుతున్నాయి.

ఇప్పటికే విడుదలైన 'మాచర్ల నియోజకవర్గం' ప్రమోషనల్ కంటెంట్ కు మంచి రెస్పాన్స్ వచ్చింది. ఈ క్రమంలో 'రారా రెడ్డి.. ఐ యామ్ రెడీ' అనే స్పెషల్ సాంగ్ ను రిలీజ్ చేయడానికి మేకర్స్ రెడీ అయ్యారు. జూలై 9న ఈ పాటను విడుదల చేయనున్నారు. అయితే అంతకంటే ముందుగా తాజాగా ఈ సాంగ్ ప్రోమోని వదిలారు.

'ఐ యామ్ రెడీ.. నన్ను ఎట్టాగా పిలిచినా రెడీ.. నా సోకులిస్త మీకు వండి.. మల్లెపూవులాంటి ఒళ్లు సెంటుబుడ్డి' అంటూ సాగిన ఈ సాంగ్‌ మాస్ ఆడియన్స్ ని ఆకట్టుకుంటోంది. మెలోడీ సాంగ్స్ కంపోజిషన్ కు పేరు గాంచిన మహతి స్వర సాగర్.. ఈసారి ఊర మాస్ ట్రాక్ ని కంపోజ్ చేశారు.

ఇందులో నితిన్ సరసన హీరోయిన్ అంజలి ఆడిపాడింది. ఇద్దరూ పోటాపోటీగా తమ గ్రేస్ ఫుల్ డ్యాన్స్ మూవ్స్ తో ఆకట్టుకున్నారు. అంజలి ఒక ఓ ఊపు ఊపేసిందనే చెప్పాలి. 'సరైనోడు' మూవీలో ఐటెమ్‌ సాంగ్‌ లో సందడి చేసిన ఈ బ్యూటీ.. మళ్లీ ఇన్నాళ్లకు ఐటెమ్‌ భామగా కనువిందు చేస్తోంది.

'రారా రెడ్డి' సాంగ్ ప్రోమోలో చివర్లో ఇంటెన్స్ యాక్షన్ బ్లాక్ ను చూపించారు. నితిన్ యొక్క అద్భుతమైన ట్రాన్స్ఫర్మేషన్ ను మనం చూడవచ్చు. కాసర్ల శ్యామ్‌ ఈ మాస్ సాంగ్ కు లిరిక్స్ అందించగా.. సింగర్ లిప్సికా హుషారుగా ఆలపించింది.

మాచర్ల మాస్ మ్యూజిక్ జాతర రేపు శనివారం సాయంత్రం శ్రీకాకుళంలోని ఎన్టీఆర్ మున్సిపల్ స్కూల్ గ్రౌండ్ లో జరగనుంది. ఈ ఈవెంట్ సందర్భంగా రారా రెడ్డి పాటను లాంచ్ చేయనున్నారు. రాజ్ కుమార్ ఆకెళ్ల సమర్పణలో ఆదిత్య మూవీస్ ఎంటర్టైన్మెంట్స్ తో కలిసి శ్రేష్ట్ మూవీస్ బ్యానర్ పై ఎన్.సుధాకర్ రెడ్డి - నికితారెడ్డి ఈ చిత్రాన్ని నిర్మిస్తున్నారు.

ప్రసాద్ మూరెళ్ల ఈ చిత్రానికి సినిమాటోగ్రఫీ అందిస్తుండగా.. సాహి సురేష్ ఆర్ట్ డైరెక్టర్ గా వర్క్ చేస్తున్నారు. మామిడాల తిరుపతి డైలాగ్స్ రాస్తున్నారు. కోటగిరి వెంకటేశ్వరరావు ఎడిటింగ్ బాధ్యతలు నిర్వహిస్తున్నారు. 'మాచర్ల నియోజకవర్గం' సినిమా ఆగస్టు 12న ప్రపంచవ్యాప్తంగా థియేటర్లలో విడుదల కానుంది.