సైకో కిల్లర్ గా బబ్లీ బ్యూటీ..?

'ఊహలు గుసగుసలాడే' సినిమాతో టాలీవుడ్ లో అడుగుపెట్టిన బబ్లీ బ్యూటీ రాశీ ఖన్నా.. తెలుగు ప్రేక్షకుల హృదయాలను కొల్లగొట్టింది. ప్రస్తుతం దక్షిణాది భాషల్లో వరుస అవకాశాలతో బిజీగా ఉన్న రాశీ.. ఇప్పుడు ఓటీటీ వరల్డ్ లో కూడా ఎంటర్ అవుతోంది. 'ది ఫ్యామిలీ మ్యాన్ 2' వెబ్ సిరీస్ ద్వారా సమంత అక్కినేని ని డిజిటల్ వేదికలకు పరిచయం చేసిన దర్శకద్వయం రాజ్ & డీకే.. ఇప్పుడు రాశీ ని కూడా ఇంట్రడ్యూస్ చేయబోతున్నారు. బాలీవుడ్ స్టార్ హీరో షాహిద్ కపూర్ డెబ్యూ వెబ్ సిరీస్ లో రాశీ కీలక పాత్ర పోషిస్తోంది. ఈ క్రమంలో మరో వెబ్ సిరీస్ లో ముద్దుగుమ్మ ఛాన్స్ కొట్టేసిందని తెలుస్తోంది.

బాలీవుడ్ స్టార్ అజయ్‌ దేవగణ్‌ ప్రధాన పాత్రలో ''రుద్ర: ది ఎడ్జ్‌ ఆఫ్‌ డార్క్‌నెస్‌'' అనే క్రైమ్‌ థ్రిల్లర్‌ వెబ్ సిరీస్ రూపొందుతున్న విషయం తెలిసిందే. ఇది అజయ్ కు డిజిటల్ డెబ్యూ. రాజేష్‌ మపుస్కర్‌ దర్శకత్వం వహిస్తున్న ఈ సిరీస్ ను అప్లాజ్ ఎంటర్‌టైన్‌మెంట్‌‌ - బీబీసీ స్టూడియోస్‌ సంస్థలు కలిసి నిర్మిస్తున్నాయి. అజయ్‌ పవర్‌ ఫుల్‌ పోలీస్‌ ఆఫీసర్ గా కనిపించనున్న 'రుద్ర' లో రాశిఖన్నా కీలక పాత్రలో నటించనుంది. ఇందులో ఆమె ఓ సైకో కిల్లర్ గా కనిపించనుందట. విపరీత మనస్తత్వం కలిగిన యువతిగా.. ఆమె పాత్ర విభిన్న కోణాల్లో సాగుతుందట. ఈ సిరీస్ జులై 21 నుంచి సెట్స్ పైకి వెళ్లనుంది. ‘లూథర్‌’ బ్రిటీష్‌ వెబ్‌ సిరీస్‌ ఆధారంగా 'రుద్ర' రూపొందుతోంది. డిస్నీ+ హాట్‌ స్టార్‌ ఓటీటీ వేదికగా ఈ సిరీస్ విడుదలకానుంది.

కాగా, షాహిద్ కపూర్ - అజయ్ దేవగన్ వంటి ఇద్దరు స్టార్ హీరోల డిజిటల్ డెబ్యూల్లో నటించే అవకాశం దక్కించుకుంది రాశీ ఖన్నా. కెరీర్ ప్రారంభంలో 'మద్రాస్ కేఫ్' అనే హిందీ చిత్రంతో బాలీవుడ్ లో ఎంట్రీ ఇచ్చిన రాశీ.. చాలా గ్యాప్ తర్వాత మళ్ళీ నార్త్ ఆడియన్స్ ని పలకరించబోతోంది. అలానే దక్షిణాదిలో వరుస సినిమాలతో రాబోతోంది. నాగచైతన్య సరసన 'థాంక్యూ' చిత్రంలో నటిస్తున్న ఈ బ్యూటీ.. గోపీచంద్ తో 'పక్కా కమర్షియల్' సినిమా చేస్తోంది. వీటితో పాటుగా ఒక మలయాళ సినిమా మరియు ఐదు తమిళ చిత్రాల్లో రాశీఖన్నా హీరోయిన్ గా నటిస్తోంది.