సినిమా చూపిస్త మావ.. కెవ్వు కేక రికార్డ్

మూడేళ్ల కిందట ‘గబ్బర్ సింగ్’ సినిమాలో కెవ్వు కేక పాట తర్వాత ఆ స్థాయిలో తెలుగు ప్రేక్షకుల్ని ఓ ఊపు ఊపిన మాస్ సాంగ్ ‘రేసుగుర్రం’లోని సినిమా చూపిస్త మావ. రేసుగుర్రం సినిమా బ్లాక్ బస్టర్ హిట్టవడంలో ఈ పాట పాత్ర కూడా కీలకం. తమన్ క్యాచీగా ఉండే ట్యూన్ ఇస్తే.. సింహా - దివ్య కలిసి మంచి హుషారెత్తించేలా ఈ పాట పాడారు. సినిమా చూపిస్త మావ అనే మాటే చాలా ఈజీగా జనాల్లోకి వెళ్లిపోయింది. ఈ పాట స్ఫూర్తితో ఓ డైరెక్టర్ కథ రెడీ చేసుకుని.. అదే పేరుతో సినిమా కూడా తీశాడంటే ఈ పాట ఎంత పాపులర్ అయిందో అర్థం చేసుకోవచ్చు.

సినిమా చూపిస్త మావ పాట ఓ అరుదైన రికార్డు సొంతం చేసుకుంది. ప్రొడ్యూసర్ నల్లమలుపు బుజ్జి యూట్యూబ్ ఛానెల్లో ఈ పాటకు కోటి వ్యూస్ దాటిపోవడం విశేషం. సౌత్ ఇండియాలో ఇది అరుదైన రికార్డు. ఇంతకుముందు ‘కొలవెరి’ పాటకు మాత్రమే ఇలాంటి ఘనత దక్కింది. ఐతే అది స్పెషల్ కేస్. దాన్ని సినిమా కోణంలో చూడలేం. రెగ్యులర్ పాటల్లో మాత్రం సినిమా చూపిస్త మావ ఎవరూ టచ్ చేయలేని రికార్డు నెలకొల్పింది. పాట వినడానికి ఎంత హుషారుగా ఉంటుందో చూడ్డానికి ఇంకా బాగా అనిపిస్తుంది. అల్లు అర్జున్ - శ్రుతి హాసన్ అదిరిపోయే స్టెప్పులు.. ప్రకాష్ రాజ్ ఫన్నీ ఎక్స్‌ ప్రెషన్స్ ఈ పాట ఇంత పెద్ద హిట్టవడానికి దోహదం చేశాయి.