బ్రేకింగ్ : టాలీవుడ్ హీరోయిన్ పై కేసు నమోదు

బీజేపీ అధికారంలోకి వచ్చాక హిందుత్వ, జాతీయవాదం దేశంలో పెరిగిపోయిందనడంలో ఎలాంటి సందేహం లేదని మేధావులు చెబుతున్నారు. ఒకప్పుడు వాక్ స్వాతంత్య్రానికి ఎక్కువగా విలువనిచ్చే ఈ దేశంలో ఇప్పుడు ఒక వర్గానికి వ్యతిరేకంగా మాట్లాడితే కేసులు, అరెస్ట్ ల దాకా వ్యవహారం వెళుతుండడంపై ఆందోళన వ్యక్తం చేస్తున్నారు.

ఇటీవలే హిందువులపై కామెంట్ చేసిన వివాదాస్పద రివ్యూ రైటర్ కత్తి మహేష్ పై కేసు నమోదైన సంగతి తెలిసిందే. అది మరిచిపోకముందే నటి, రాజకీయ నాయకురాలు మాధవీలతపై కేసు నమోదైంది.

సోషల్ మీడియాలో ఎప్పుడూ యాక్టివ్ గా ఉండే నటి మాధవీలత .. తన ఫేస్ బుక్ లో హిందువులపై కామెంట్ చేసిందని సమాచారం. అయితే ఈ కామెంట్స్ తమ మనోభావాలు దెబ్బతీసే విధంగా ఉన్నాయని హైదరాబాద్ వనస్థలిపురంకు చెందిన గోపీకృష్ణ అనే విద్యార్థి రాచకొండ సైబర్ క్రైమ్ పోలీసులకు ఫిర్యాదు చేశారు.

దీంతో పోలీసులు సోమవారం నటి మాధవీలతపై 295-ఏ సెక్షన్ కింద కేసు నమోదు చేసినట్లుగా తెలిపారు.

ఇలా ఇంతకుముందు కూడా హిందుత్వం చాలా మంది కామెంట్ చేసినా కేసుల వరకు పరిస్థితి వెళ్లలేదు. కానీ ఇప్పుడు కేసులు నమోదవుతుండడం చర్చనీయాంశమైంది.