‘రాధే శ్యామ్‌’ ఆల్బ‌మ్.. ఫస్ట్ సింగిల్ అప్పుడేనా..?

పాన్ ఇండియా స్టార్ ప్ర‌భాస్‌ అప్ క‌మింగ్ మూవీ ‘రాధే శ్యామ్‌’. ప్రభాస్ స‌ర‌స‌న‌ పూజా హెగ్డే హీరోయిన్ గా న‌టిస్తున్న ఈ చిత్రాన్ని.. ‘జిల్’ఫేమ్ రాధా కృష్ణ తెరకెక్కిస్తున్నాడు. స్వచ్ఛమైన ప్రేమకావ్యంగా రూపొందుతున్న ఈ సినిమాపై ఫ్యాన్స్ లో భారీ అంచనాలు ఉన్నాయి.

ఈ మోస్ట్ అవైటెడ్ మూవీకి సంబంధించిన టీజర్ కోసం ఫ్యాన్స్ కళ్లు కాయలుకాసేలా చూస్తుండగా.. ఇటీవల గ్లింప్స్ వదిలింది యూనిట్. ఈ గ్లింప్స్ కు భారీ స్పందన లభించింది. దీంతో.. ఆడియన్స్ లో సినిమాపై క్యూరియాసిటీ మరింతగా పెరిగిపోయింది. ఈ గ్లింప్స్ లోని రెట్రో ట్రైన్ కోసమే ఏకంగా 1.6 కోట్లు ఖర్చు చేశారని ప్రచారం జరిగిన విషయం తెలిసిందే. దీంతో.. ఈ సినిమాకు ఎంత ఖర్చు చేశారోనని చర్చించుకున్నారు.

అయితే.. ఈ వింటేజ్ లవ్ స్టోరీకిి మ్యూజిక్ ప్రాణమనే చెప్పాలి. ల‌వ్ స్టోరీని అద్భుతంగా చెప్ప‌డంలో సంగీతం ఎంత‌టి పాత్ర పోషిస్తుందో ప్ర‌త్యేకంగా చెప్పాల్సిన ప‌నిలేదు. బ్యాగ్రౌండ్ స్కోర్ నుంచి పాట‌ల వ‌ర‌కూ చాలా కీల‌కం. మ‌రి, ఈ రాధేశ్యామ్‌ ఆల్బమ్ ఎలాంటి వండ‌ర్ క్రియేట్ చేయ‌నుందోన‌ని అంద‌రూ ఆస‌క్తిగా ఎదురు చూస్తున్నారు.

ఈ చిత్ర సంగీత ద‌ర్శ‌కుడు జస్టిన్ ప్రభాకరన్ సాంగ్స్ కోసం సౌత్ ఇండ‌స్ట్రీలోని మ్యూజిక్ ల‌వ‌ర్స్ ఈగ‌ర్ గా వెయిట్ చేస్తున్నారు. లేటెస్ట్ బ‌జ్ ప్ర‌కారం.. ఫస్ట్ సింగిల్ ను రిలీజ్ చేయ‌డానికి టైం కూడా ఫిక్స్ చేసిన‌ట్టు తెలుస్తోంది. అందుతున్న స‌మాచారం మేర‌కు.. మార్చిలోనే రిలీజ్ చేయ‌నున్న‌ట్టు గాసిప్స్ వినిపిస్తున్నాయి. మరి, ఈ ప్యూర్ ల‌వ్ స్టోరీకి.. ప్ర‌భాక‌ర‌న్ ఎలాంటి ఆల్బమ్ అందించాడో చూడాలి.