బాహుబలి బాటలో రాధేశ్యామ్.. వర్కౌట్ అవుతుందా..??

పాన్ ఇండియా స్టార్ ప్ర‌భాస్ లవర్ బాయ్ పాత్రలలో ఇదివరకే కనిపించాడు. లవ్ స్టోరీస్ కూడా చాలానే చేసాడు. కానీ ప్రపంచం మొత్తం చూసే లవ్ స్టోరీ చేయడం ఇదే ఫస్ట్ టైం. అపర ప్రేమికుడి పాత్ర‌లో నటించిన సినిమా 'రాధేశ్యామ్'. ఈ సినిమాలో డార్లింగ్ నుండి ఇంతవరకు చూడని ఆటిట్యూడ్, స్టైల్, రొమాన్స్ చూపించనున్నాడు డైరెక్టర్ రాధాకృష్ణ కుమార్. స్టార్ హీరోయిన్ పూజాహెగ్డే ఈ ప్రేమకథలో డార్లింగ్ ప్రేమికురాలిగా నటించింది. ఈ రొమాంటిక్ పీరియడికల్ లవ్ మూవీలో ప్రభాస్ పూజల పెయిర్ ఆహా అనిపిస్తుంది. జిల్ ఫేమ్ రాధాకృష్ణ కుమార్ దర్శకత్వంలో గోపికృష్ణ, యూవీ క్రియేష‌న్స్ బ్యానర్స్ సంయుక్తంగా నిర్మిస్తున్న ఈ పాన్ ఇండియా మూవీ పై ఇప్పటికే అంచనాలు తారాస్థాయికి చేరుకున్నాయి.

రాధేశ్యామ్ ఐదు భాషలలో అంటే తెలుగు త‌మిళ‌ హిందీ క‌న్న‌డ మలయాళంలో ఏకకాలంలో విడుద‌ల కానుంది. అయితే ఇటీవల వాలంటైన్స్ డే సందర్బంగా రాధేశ్యామ్ గ్లిమ్స్ విడుదల చేసిన చిత్రబృందం.. అదే వీడియోలో రిలీజ్ డేట్ జూలై 30 అని ప్ర‌క‌టించిన సంగ‌తి తెలిసిందే. ఫస్ట్ గ్లింప్స్ చూసేసరికి డార్లింగ్ అభిమానుల ఆనందానికి అవధులు లేకుండా పోయాయి.

అయితే ఇక్కడ అసలు విషయం ఏంటంటే.. డార్లింగ్ ప్ర‌భాస్ కెరీర్ మొత్తంలో జూలై నెల‌లో విడుద‌లైన ఒకేఒక్క మూవీ 'బాహుబ‌లి ది బిగినింగ్'. 2015 జూలై 10న బాహుబలి బిగినింగ్ విడుదలై సంచలన విజయం సాధించింది. జానపద చిత్రంగా తెరకెక్కిన ఆ సినిమా 500 కోట్ల పైగా వసూల్ రాబట్టిన ఫస్ట్ తెలుగు సినిమాగా రికార్డు నెలకొల్పింది.

అయితే ఈసారి బాహుబలితో కలిసోచ్చిన జులై నెలలో రాధేశ్యామ్ విడుదల చేయనున్నాడు ప్రభాస్. మరి జులై 30న ఆ సెంటిమెంట్ వర్కౌట్ అవుతుందా.. రాధేశ్యామ్ కూడా బాహుబలి రేంజిలో బ్లాక్ బస్టర్ కానుందా చూడాలి. ఇదిలా ఉండగా.. ఈ సినిమాలో రెబల్ స్టార్ కృష్ణంరాజు, భాగ్యశ్రీ, జయరాం కీలకపాత్రల్లో నటిస్తున్నారు.