చైనాలో దున్నేస్తున్న బాలయ్య హీరోయిన్‌

బాలకృష్ణ 'లెజెండ్‌', 'లయన్‌' చిత్రాల్లో హీరోయిన్‌ గా నటించిన రాధిక ఆప్టే గురించి ప్రత్యేకంగా పరిచయం అక్కర్లేదు. తెలుగు, తమిళం, హిందీ భాషల్లో నటించి నటిగా మంచి గుర్తింపు దక్కించుకుంది. ఇదే సమయంలో ఈమె చేసే వివాదాస్పద వ్యాఖ్యలు కూడా ఆమెకు మరింతగా గుర్తింపును తెచ్చి పెట్టాయి. హాలీవుడ్‌ సినిమాలో కూడా నటించిన రాధిక ఆప్టే గత ఏడాది హిందీలో 'అంధాదున్‌' అనే చిత్రంలో నటించింది. బాలీవుడ్‌ సినీ విమర్శకుల నుండి ప్రశంసలు దక్కించుకున్న ఆ చిత్రం తాజాగా చైనాలో విడుదల అయ్యింది.

ఇండియాలో ఒక మోస్తరుగా వసూళ్లను దక్కించుకున్న అంధాదున్‌ కు చైనా ప్రేక్షకులు బ్రహ్మరథం పడుతున్నారు. విడుదలైన మొదటి రోజే అక్కడ పాజిటివ్‌ టాక్‌ ను దక్కించుకోవడంతో పాటు, స్థానిక మీడియాలో సినిమా గురించి ప్రముఖంగా వార్తలు రావడంతో పాటు, సినిమాపై పాజిటివ్‌ గా కథనాలు వచ్చాయి. దాంతో చైనా సినీ ప్రేక్షకులు అంధాదున్‌ చిత్రాన్ని తెగ చూస్తున్నారు. కేవలం నాలుగు రోజుల్లోనే 100 కోట్ల వసూళ్లను అక్కడ సాధించింది. చూడబోతుంటే చైనాలో టాప్‌ వసూళ్లు దక్కించుకున్న సినిమాల సరసన రాధిక ఆప్టే దక్కించుకునే అవకాశం ఉందని విశ్లేషకులు అభిప్రాయం వ్యక్తం చేస్తున్నారు.