బాలయ్య హీరోయిన్ సరికొత్త అవతారం

వైవిధ్యమైన సినిమాలతో బాలీవుడ్ లో తనకంటూ ఓ ప్రత్యేక గుర్తింపు తెచ్చుకుంది రాధికా ఆప్టే. తెలుగులో బాలయ్య సరసన ఆమె నటించిన ‘లెజెండ్’ కూడా ఆమెకు మంచి పేరు తెచ్చిపెట్టింది. ఐతే తెలుగులో హీరోయిన్లకు సరైన విలువ ఉండదు అంటూ తిరిగి బాలీవుడ్ కే వెళ్లిపోయిన రాధిక.. అక్కడ తన టేస్టుకు తగ్గట్లు వెరైటీ సినిమాలు చేస్తోంది. ఆమె ప్రధాన పాత్ర పోషించిన సైకలాజికల్ థ్రిల్లర్ ‘ఫోబియా’ ఫస్ట్ లుక్ పోస్టర్ ఇటీవలే విడుదలైంది. చూడగానే ఆకట్టుకునేలా ఉన్న ఈ పోస్టర్ సినిమా మీద ఆసక్తి రేకెత్తిస్తోంది. ఈ సినిమాలో అనేక రకాల భయాలు.. మానసిక ఒత్తిళ్లతో సతమతమయ్యే మెహక్ అనే ఆర్టిస్టు పాత్రలో కనిపించబోతోంది రాధికా ఆప్టే.

సినిమా థీమ్ ఏంటో అర్థమయ్యేలా ఫస్ట్ లుక్ పోస్టర్ డిజైన్ చేశారు. తాను ఎంచుకునే పాత్రల విషయంలో చాలా శ్రద్ధగా ఉండే రాధిక.. ఈ క్యారెక్టర్ చేయడం కోసం ఎంతో రీసెర్చ్ చేసిందట. ఎంతోమంది సైక్రియాట్రిస్టులను.. మానసిక రోగులను కలిసి.. ఇన్ పుట్స్ తీసుకుందట. పవన్ కృపాలిని దర్శకత్వం వహిస్తున్న ఈ సినిమాను ప్రముఖ నిర్మాణ సంస్థ ‘ఈరోస్ ఇంటర్నేషనల్’ నిర్మిస్తోంది. తన కెరీర్లో ‘ఫోబియా’ ఓ మైల్ స్టోన్ మూవీ అవుతుందని అంటోంది రాధిక. దీంతో పాటు హిందీలో ఇంకో రెండు మూడు సినిమాలు చేస్తోందామె. దక్షిణాదిన సూపర్ స్టార్ రజినీకాంత్ సరసన ఆమె నటించిన ‘కబాలి’ మే నెలాఖరులో ప్రేక్షకుల ముందుకు రాబోతోంది.